608
Бэшүүрэй түрэлхидэй харууһагүй үлэһэн үхибүүдэй түбтэ Солонгос гүрэнэй оюутад болон Kyoung Hee Cho багшатаяа ерэжэ, тэдэнэй байдалтай танилсаһан байна.
Буряад Уласай Бэшүүр аймагай ниигэмэй эмхиин хүтэлбэрилэгшэ Игорь Савельевэй хэлэһээр, Hanyang ехэ һургуулиин волонтёрнуудай Volunteer Corpsof ERICA Campus эмхиин хүтэлбэрилэгшэ, профессор Kyoung Hee Cho түрэлхидэй харууһагүй үлэһэн үхибүүдэй түб ехэтэ һайхашаагаа. Тэрэ зундаа Буряадай гүрэнэй ехэ һургуулиин волонтёрнуудтай хамта дахинаа ерэжэ, түбтэй хамта шэнэ түсэлнүүдые бэелүүлхэ тухайгаа мэдүүлээ.
Erica Campus эмхиин волонтёрнууд дэлхэйгээр дүүрэн ябажа, хүүгэдэй ниигэмэй эмхинүүдтэ туһа хүргэдэг, дэмжэдэг һайхан заншалтай. Энэшье удаа Бэшүүр аймагай хүүгэдэй түбтэ барилга хэжэ, сэсэгүүдые тариха.
Бэшүүр аймагай хүүгэдэй түб оршон тойроноо болбосоруулха талаар ажалаа урагшатай ябуулдаг. «Сбербанк» бүлгэмэй Байгалай таһагай үнгэргэдэг грантнуудай мүрысөөндэ энэ эмхи хоёрдохи жэлээ түрүүлнэ. Үнгэрһэн жэлдэ Бэшүүр аймагай хүүгэдэй түб 565 мянган түхэригэй грантда хүртэжэ, тамирай талмайн барилга эхилһэн байна.
Үнгэрһэн долоон хоногто «Сбербанк» бүлгэмэй Байгалай таһагай грантнуудай мүрысөөнэй дүнгүүдые соносхожо, Бэшүүр аймагай хүүгэдэй түб илагшадай тоодо ороо. Хахад сая түхэригэй шан тамирай талмайн барилга болон болбосон түхэлтэй болгохо талаар ажалда шэглүүлэгдэхэ.
Буряад уласай ниигэмэй хамгаалгын яаманай мэдээсэлэй албанай гэрэл зураг
