797
Ородой Холбоото Уласай 77 можо нютагай болбосон түхэлтэй хотын оршон байгуулха Бүхэроссиин мүрысөөндэ хабаадана. Тэрэ тоодо Буряад Уласай Бабушкин, Гусиноозёрск, Захаамин хотонууд болон түүхэтэ һуурин Хяагта хото мэдүүлгэ оруулһан байна.
Мүрысөөндэ хабаадаха мэдүүлгэнүүдые болбосон түхэлтэй болгохо, хотонуудые бариха, арихитектура һалбаринуудай мэргэжэлтэ шүүбэришэд гурбан шатада шалгаха, сэгнэхэ юм гэжэ Ородой Холбоото Уласай барилгын яаман мэдээсэнэ. Мэргэжэлтэ шүүбэришэдэй сэгнэлтээр, эмхинүүд хоорондын ажалай бүлэг Бүхэроссиин мүрысөөнэй Федеральна комиссида дүнгүүдые дамжуулха юм. Ородой Холбоото Уласай Засагай газарай вице-премьер Виталий Муткогой хүтэлбэрилһэн Федеральна комисси мүрысөөнэй дүн согсолхо. Ородой Холбоото Уласай барилгын, мүнгэн һангай, соёлой яамануудай, Федеральна Зүблэлэй түлөөлэгшэд Федеральна комиссида оролсохо юм.
«Мүнөө жэлэй мүрөсөөндэ хабаадаха мэдүүлгэнүүдэй талаар хубилалтануудые оруулһан байнабди. Мүрысөөндэ хабаадагшадай түсэлнүүд тоогоор илаха бэшэ, харин һайн шанартай байха ёһотой. Сэгнэлтын талаар хубилалтанууд оруулагдаа», - гэжэ Ород гүрэнэй барилгын болон гэр байрын ажахын сайдай орлогшо Максим Егоров хэлэбэ.
Ородой Холбоото Уласай Юрэнхылэгшэ Владимир Путинай даалгабаряар, 2018 ондо болбосон түхэлтэй хотын оршон байгуулха Бүхэроссиин мүрысөөн эмхидхэгдэһэн байна. Бүхэроссиин мүрысөөндэ 100 мянга хүрэтэр ажаһуугшадтай бага хотонууд хабаадаха аргатай.
2018 ондо Хяагта хото мүрысөөнэй түгэсхэлэй шатада хабаадажа, оройдоол хэдыхэн балл дуталдажа, илалта туйлаагүй. Буряад уласта бүхыдөө 4 бага хото болон нэгэ түүхэтэ һууринда хамта 80 мянганһаа дээшэ хүн ажаһуудаг.
Үнгэрэгшэ жэлдэ Ород гүрэнэй 82 можо нютагһаа мүрысөөндэ хабаадаха тухай 455 мэдүүлгэ ороһон байна. 43 можо нютагай 80 түсэл эрхимлээ. Мүрысөөндэ илагшад федеральна бюджетһээ 30 саяһаа 100 сая хүрэтэр мүнгэн тэдхэмжэдэ хүртэһэн байна. 2018 ондо илаһан түсэлнүүд байгша оной дүүрэтэр бэелүүлэгдэхэ.
