657
Хүдөө нютагуудта элүүрые хамгаалгын һалбари хүгжөөлгын хэмжээндэ Буряад Уласай Бабанта аймагай Романовка нютагта шэнэ амбулатори баригдаха. Тус һууринда 1,8 мянган хүн ажаһуудаг.Эмнэлгын шэнэ эмхи барилгада Алас Дурнын федеральна тойрогһоо 42 сая түхэриг һомологдохо юм. Шэнэ амбулаторидо тарилга хэхэ таһалга, һэргылэмжын ажалай кабинет болон лабораторинууд хараалагданхай.
Зургаан жэлэй саана Романовка һууринай амбулатори дүрэжэ, ажаһуугшадта эмнэлгын туһа хуушарһан станционарта хүргэдэг. Тус байшан мүнөө үеын болон САНПиН-ай эрилтэнүүдтэ тааранагүй. Ехэнхидээ ажаһуугшад аймагай түбэй больницада хандадаг юм.
Романовка нютаг Улаан-Үдэһөө болон аймагай больницаһаа эмшэд ерэжэ, ажаһуугшад уйтан, хабшуу байшанда ээлжээндэ һуудаг.
- Би гурбан үхибүүтэйб. Тэрэ бүхэндэ аймагай больница хандаха арга олдодоггүй. Нютагһаа гарангүй, эмнэлгэ гараха аргатай һаа, ехэ һайн, - гэжэ Романовка нютагай ажаһуугша Елена Усова хэлэбэ.
Бабанта аймагай түбэй больницын ахамад эмшэн Алексей Карловай хэлэһэнэй ёһоор, холо оршодог нютагуудта ажаһуудаг хүнүүдтэ гэр дээрэнь эмнэлгын туһа хүргэхэ шухала гэжэ тэмдэглэбэ.
Мүнөө Романовкын амбулаторидо 1243 ажаһуугшад болон «Хиагдинское» уурхайн 600 хүдэлмэрилэгшэдтэ эмнэлгын туһа хүргэдэг. Тиихэдэ тус һуурин аймагай түбһөө 172 модоной зайда оршодог гээд тэмдэглэлтэй.
Буряад Уласта ниигэмэй хүгжэлтын талаар федеральна болон уласай программанууд бэелүүлэгдэнэ. 2018 оной туршада улас дотор 11 ФАП, 4 амбулатори болон хүүгэдэй хоёр поликлиника нээгдээ гэжэ һануулнабди. 2019 ондо элүүрые хамгаалгын һалбарида 6 эмхи баригдаха. Алас Дурнын федеральна тойрогой тэдхэмжын хэмжээндэ гараха гурбан жэлэй туршада элүүрые хамгаалгын 10 эмхи баригдаха, заһабарилагдаха юм.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди.
Анна Огороднигой гэрэл зураг
