680
Буряад уласай Байгаалиин нөөсэнүүдэй яаманда хүдөө нютагуудта бог шорой хуряаха талаар ажал яажа ябуулагадахаб гэжэ хөөрэжэ үгэбэ.
Уласай бүхы аймагуудта һомоной захиргаануудтай суг хамта бог шорой хуряаха, шэрэхэ гурим байгуулагдаа. Тиихэдэ хэды техникэ хэрэглэгдэхэб, бог шорой хуряаха, усадхаха талаар асуудалнууд шиидхэгдээ. Нютагуудта бог шорой суглуулха контейнернүүдэй талмай элирүүлхэ талаар аймагуудай захиргаануудта мүнөө ажал ябуулагдана.
- Ехэнхи аймагуудта бог шорой суглуулха талмайнууд үгы. Санитарна-эпидемиологическа хуулиин эрилтэнүүдһээ боложо, талмайнуудые барилгада саг хэрэгтэй. Тиихэдэ хүдөө нютагуудта үнгэргэгдэһэн суглаануудта контейнергүйгөөр бог шорой суглуулха тухай шидхэбэри абтаһан байна, - гэжэ Буряад Уласай байгаалиин нөөсэнүүдэй яаманай таһагай дарга Светлана Трофимова хэлэбэ.
Хүдөө нютагуудта ажаһуугшад бог шорой суглуулха хайрсагуудые табиха юм. Удаань бог суглуулха тусхай талмайнууд баригдажа, тэндэһээ бог хуряагдаха.
Тиихэдэ шухала асуудалнуудай нэгэн хадаа бог шорой хуряалгын түлөө түлбэри болоно. Хүдөө нютагуудай ажаһуугшадта һаяын сагта «Экоальянс» бүлгэмтэй хэлсээ баталха хэрэгтэй. Һарын үнгэрхэдэ, гэртэ ажаһуудаг гэжэ хүнүүдэй бүридхэлэй тоогоор түлбэри тоологдохо. Тиихэдэ бүридхэлдэ абтаһан газарһаа ондоо тээ ажаһуудаг зон «ЭкоАльянс» бүлгэмдэ хандаха болоно.
- Тиихэдэ бог, хаядаһа суглуулха талаар түлбэриин түлөө хуулиин ёһоор хүнгэлэлтэнүүд хараалагданхай. Эсэгэ ороноо хамгаалгын Агууехэ дайнай хабаадагшад, эрэмдэг бэетэй болоһон зон, «Ленинградай бүһэлэлтэдэ байгша» гэһэн тэмдэгээр шагнагдаһан хүнүүд, эрэмдэг бэетэй үхибүүдтэй гэр бүлэнүүд, ажалай, ара талын ажалай ветеранууд, хамалганда хохидоһон хүнүүдхүнгэлэлтэнүүдтэй юм. Ажаһуугшадай хүнгэлэлтэ абахын тула ниигэмэй эмхинүүдтэ хандаһанай хэрэггүй, - гэжэ Буряад Уласай ниигэмэй хамгаалгын яаманай корооной түрүүлэгшэ Оксана Емельянинко тодорхойлбо.
Байгаалиин нөөсэнүүдэй сайдай тэмдэглэһээр, Буряад Улас бог, хаядаһа хуряахын түлөө эгээ бага түлбэритэй 20 можо нютагай тоодо ороно.
«Экоальянс» бүлгэмэй ажал Буряад Уласай Байгаалиин нөөсэнүүдэй яаман хинан шалгаха юм. Тус эмхиин ажалаа муугаар ябуулбал, Байгаалиин нөөсэнүүдэй яаманда 8(3012)460616 гэһэн утаһаар гү, али Улаан-Үдэ хото, 1905 оной Революциин гудамжа, 11А гэһэн хаягаар хандажа болоно.
