902
Аша үрэтэй түсэлнүүдэй федеральна тобьёгто оруулагдаһан түсэлэй ёһоор Ивалга аймагай Поселье һууринда 450 һууритай һургуули баригдана. Мүнөө эндэ фундамент хэгдэжэ, нэгэдэхи дабхарай хана бодхоогдоо.
Түсэлэй ёһоор, найман байшанһаа бүридэһэн һургуули, дунда холбоотой байха. Үхибүүд наһанаай бүлэгүүдээр хубааран, ондо ондоо байшануудта һураха. Һургуулида халуун эдеэ хоол бариха газар, тамирай заал баригдаха. Тиихэдэ эрэмдэг бэетэй хүүгэдэй һаадгүй оршондо ябаха тула лифт болон үргэдэг тусхай хэрэгсэл тохогдохо.
Һургуули шадархи дэбисхэр гурбан газарта хубаагдаха. Тамирай талмайда хүл бүмбэгэ, баскетбол, волейбол наадаха газар бариха гэжэ түсэблэгдэнхэй. Һурагшадай хэшээлэй дунда амарха газар һургуулиин байшанһаа холо бэшэ баригдаха. Ажахын газар эдеэ хоол бариха газарай талаһаа баригдахаар хараалагданхай. Поселье һууринда һургуулиин барилга эхилхэһээ урид, газарай шэнжэлэл хэгдэжэ, СанПинай эрилтэнүүдтэ тааруу гэжэ баталагдафан байна.
Һургуулиин барилгада федеральна болон уласай бюджедүүдһээ 431 сая түхэриг гаргашалагдаха. Тиихэдэ федеральна бюджедһээ 423 сая тухай түхэриг һомологдохо юм.
Буряад уласай болбосоролой болон эрдэм ухаанай яаманай мэдээсэлээр, Ивалга аймагай Поселье һууринда 7-тойһоо 18 хүрэтэр 780 үхибүүн ажаһуудаг. Тэдэнэр энэ һууринһаа ондоо тээ оршодог һургуулинуудта һурадаг. Шэнэ һургуулиин баригдаха Улаан-Үдын 54-дэхи, 44-дэхи, 8-дахи, 37-дохи, 33-дахи, 40-дэхи, 14-дэхи, 9-дэхи, 4-дэхи, тиихэдэ Ивалга аймагай Сужаагай дунда һургуули сүлөөрхэ.
2019 оной декабрь һарада барилга дүүргэхээр түсэблэгдэнэ.
