1208
Жэл бүри Ураалай саанай үнгэргэгдэдэг Бүхы Сибириин һурагшадай олимпиадын дүнгүүдые Новосибирск хотодо согсолбо. Буряад уласай 5 һурагша эндэ амжалта туйлажа, Новосибирск хотын Академгородогой Зунай һургуулида тэдэнэр һуралсал гараха аргатай.
Бүхы Сибириин һурагшадай нээмэл олимпиада хадаа ахалагша ангинуудай һурагшадай эгээл ехэ олимпиадануудай нэгэн болоно. Новосибирскын гүрэнэй ехэ һургуулиин эрдэмэй-һуралсалай түб информатика, хими, физикэ тоо бодолго, биологи гэһэн предмедүүдээр олимпиада эмхидхэдэг юм. Тиихэдэ байгша ондо анха түрүүшынхиеэ һурагшад астрономи хэр зэргэ мэдэхэ байһанаа шалгаһан байна.
Бүхы Сибириин һурагшадай нээмэл олимпиада гурбан шатада үнгэрдэг: хоёр шатань – шэлэн абалгын, гурбадахинь түгэсхэлэй шата болоно. Жэл бүри олимпиадын үнгэргэгдэхэ талмайнууд Сибириин, Алас Дурнын, Ородой Холбоото Уласай Түб можонуудта, Ураал, Поволжье, Казахстанда байгуулагдадаг юм.
2018-2019 һуралсалай жэлдэ олимпиадын түгэсхэлэй шатада 6632 һурагша хабаадаа, тэрэ тоодо, Буряад уласай – 80 хүн. Бүхыдөө хэмжээ ябуулгын 3 шатада 30 403 һурагша хаба шадалаа туршаһан байна. Бүхы Сибириин һурагшадай нээмэл олимпиадын түгэсхэлэй шатын дүнгүүдээр 1433 һурагшад илагшадай тоодо ороо.
Буряад уласай һурагшад олимпиадын шангай һууринуудта хүртэжэ, 6 дипломоор шагнагдаһан байна. 11-дэхи ангиин һурагша Андрей Бадмаев хими, биологиин хоёр олимпиадада эрхимлээ. Тиихэдэ химиин олимпиадада Никита Алексеев баһал һайн дүнгүүдые харуулаа. Дмитрий Минеев – тоо бодолгоор, Маргарита Петрова – информатикаар, Жамсо Хайдапов физикээр амжалтануудые туйлаа. Шангуудай һуури эзэлһэн 8-дахи, 9-дэхи, 10-дахи ангинуудай һурагшад Новосибирск хотын Академгородогой Зунай һургуулида уригдаа. 11-дэхи ангинуудай һурагшад Ород гүрэнэй ехэ һургуулинуудта ороходоо, хүнгэлэлтэй байха.
Новосибирскын гүрэнэй ехэ һургуулиин эрдэмэй-һуралсалай түбэй мэдээсэлэй албанай гэрэл зурагууд
