​​«Эрхим багша» –шэнэ гуримаар

Эдэ үдэрнүүдтэ Улаан-Үдэ хото­до “Буряад Уласай эрхим баг­ша” элирүүлэгдэхэнь. 23-да­хияа эмхидхэгдэжэ байһан тус урилдаанда Буряадай бүхы айма­гуудай түлөөлэгшэд хабаадана.

Табан үдэрэй туршада багша бүхэнэй бэлиг талаан харагдаха, тэдэ өөрыгөө шэнэ талаһаа нээжэ­шье магад. Мүнөө жэлэй урилда­ан бүхыгөөрөө энээниие харуулха юм. Юуб гэхэдэ, тэрэ шэнэ гуримаар үнгэргэгдэжэ байнхай.

- 23 жэлэй хугасаа соо “Эрхим баг­шын” мүрысөөн элдэб янзын гуримаар үнгэргэгдэдэг байгаа. Харин мүнөө жэл гол түлэб багшанарай шадабари, дүй дүршэл сэгнэгдэхэ. Гэбэшье олон талаһаа хаража үзэхэбди, - гэжэ Буря­ад Уласай Болбосоролой болон эрдэм ухаанай яаманай сайдай орлогшо Ва­лерий Поздняков хэлэнэ.

Сайдай орлогшын хэлэһээр, баг­ша бүхэн аймагуудтаа түрүүлжэ, бэрхэ шадабаритай байһанаа хару­улаа. Тиимэһээ тэдэ бусадтай дүй дүршэлөөрөө хубаалдаха болоно. “Эр­хим багшада” хабаадагшад һайн үрэ дүн харуулдаггүй һургуулинуудай багшанарай урда хоёрдохи жэлээ нэ­эмэл хэшээлнүүдые үнгэргэнэ.

Заншалта ёһоороо “Эрхим баг­ша” гэһэн урилдаан хэдэн шатаһаа бүридэнэ. “Би - багшаб!” гэһэн темээр эссе-найруулга бэшэһэн байна. Багша бүхэнэй Интернедтэхи хубиин хуудаһан сэгнэгдээ. Гэхэтэй хамта, методическа талаар хүн бүхэн ямар бэлэдхэлтэйб гэһэн һонирхолтой шата урилдаанай бүридэлдэ оруулаг­даа.

Үхибүүдтэ хэшээл үнгэргэһэнэй удаа 15 түрүү багшанар элирүүлэгдээ. Удаань тэдэ хүүгэдтэй ан­гиин саг үнгэргэхэ гэһэн даабари дүүргээ. Мүн тиихэдэ һуралсалай түсэл зо­хёожо, бусадта харуулаа. “Сайдтай хөөрэлдөөн” гэһэн хэмжээн урилдаанай үшөө нэгэ һонирхолтой шата болоно.

Байгша оной “Эрхим багша” Улаан-Үдэ хотын 63-дахи һургуулиин дэр­гэдэ үнгэргэгдэнэ. Юундэб гэхэдэ, 63-дахи һургуулиин шэнэ байшан оройдоол 2018 оной сентябриин 1-дэ ашаглалгада тушаагдаа бшуу. Валерий Поздняковой тэмдэглэһээр, Буряад Уласай Толгойлогшо Алек­сей Цыденовэй ашаар тус һургуули шэнэ оньһон хэрэгсэлнүүдээр хан­гагданхай. Урилдаанда хабаадаг­шад иимэ оршон байдалда хэшээл үнгэргэхэдөө, улам далижажа, һайн эрдэм мэдэсэ үхибүүдтэ дамжуул­ха гээд найдагдана. Бидэ иимэ томо һайхан һургуулинуудые барижа ша­дадаг болообди гэжэ хүн бүхэн хара­жа байг лэ.

Шэнэ һургуулида гансашье эрдэм мэдэсэ хүүгэд абана бэшэ, мүн бэлиг талааниинь мүлигдэнэ. Нээлгын баяр ёһололой үедэ сугларагшад энээ­ниие бодотоороо мэдэрээ. 63-дахи һургуулиин шабинар дуу, хатараараа бултаниие баярлуулаа.

Апрелиин 26-да Буряадаймнай түрүү багшын нэрэ мэдэгдэхэ.

Илалта туйлаһан эрхим багша уласаа түлөөлжэ, Ородой Холбооной хэмжээнэй урилдаанда хабаадаха эр­хэдэ хүртэхэ.