816
Эсэгэ ороноо хамгаалгын Агууехэ дайнай дүүрэһээр 74 жэлэй ойн баярта дашарамдуулан, Буряад уласай аймагуудта болон Улаан-Үдэдэ «Хэтын жагсаал» гэһэн хэмжээ ябуулга майн 9-дэ үнгэрхэ. Баатар сэрэгшэдэй дурасхаал мүнхэлһэн акцида хүн бүхэн хабаадаха аргатай.
Улаан-Үдэдэ «Хэтын жагсаал» гэһэн хэмжээ ябуулга Буряадай гүрэнэй ехэ һургуулиин дэргэдэ 9.30 сугларжа, Илалтын жагсаалай удаа Соведүүдэй талмай дээгүүр гаража, Ерабанова, Коммунистическая гудамжануудаар алхалжа, Илалтын хүшөө ерэхэ юм. Улаан-Үдын 25 мянганһаа дээшэ ажаһуугшад Эсэгэ ороноо хамгаалгын Агууехэ дайнда хабаадаһан, ара талын ажалда хүдэлһэн хүнүүдэй гэрэл зурагуудые барижа, «Хэтын жагсаалда» алхалха гэжэ хараалагдана.
Хэмжээ ябуулга үнгэргэлгэдэ 600-гаад волонтёрнууд туһа хүргэхэ. «Илалтын волонтёрнуудай» зэргэдэ хабаадалсаха гэбэл, майн 3 болотор бщридхэлдэ абтаха шухала.
Үнгэрһэн жэлэй Илалтын үдэрэй хэтын жагсаалда 22 мянганһаа дээшэ зон хабаадаа гэжэ һануулнабди.
Анна Огороднигой гэрэл зураг
