​​Улаан-Үдын бүлгэм Израильда һуралсал гараха

Буряад уласта апрелиин 26-28-най үдэрнүүдтэ Алас Дурнын тойрогой IT-Start гэһэн стартап-һургуули эмхидхэгдээ. Энэ хэмжээ ябуулгада Буряад уласай, Эрхүү можын, Үбэр Байгалай 140 хабаадагшад IT һалбарида түсэлнүүдые бэлдэһэн байна.

Израильда һуралсал гараха гэһэн гол шанда уһа сэбэрлэхэ Tasty water гэһэн Алексей Эрдынеевэй түсэл хүртэбэ.

- Һужаагаар дамжуулагдаһан уһа сэбэрлэхэ гэжэ түсэл зохёогдоо. Сэбэр уһан хадаа олон гүрэнүүдтэ шиидхэхэ асуудал болонхой. Ородой Холбоото Уласай можо нютагуудта, удаань Азиин гүрэнүүдтэ түсэлөө дурадхаха түсэбтэйбди, - гэжэ түсэл зохёогшод хэлэбэ.

Энэ хэмжээ ябуулгада Буряадай гүрэнэй ехэ һургуули - II һуури, Зүүн Сибириин технологиин болон хүтэлбэриин гүрэнэй ехэ һургуули III һуури эзэлээ.

Тиихэдэ Алас Дурнын тойрогой IT-Start гэһэн стартап-һургуулиин хэмжээндэ "Ниигэмэй шэглэлэй түсэл" гэһэн тусхай шан байгуулагдаа. Тусхай шанда буряад хэлэ шудалха талаар "Лучник" гэһэн түсэл 3-дахи һуури эзэлээ. Эхин классуудай багшанарай хэрэглэхэ Assistant teacher хабсарал 2-дохи һуурида хүртөө. Эрэмдэг бэетэй зоной аюулгүй зам зохёожо үгэхэ "Движение без границ" – GPS хабсарал түрүүшын һуури эзэлээ. Илагшадта шангууд болон дипломууд барюулагдаа.

Ородой Холбоото Уласай Юрэнхылэгшын грантнуудай жасын болон «МТС» бүлгэмэй дэмжэлгээр тойрогуудай стартап-һургуулинуудые шэнэ оньһо нэбтэрүүлгэ хүгжөөлгын агентство эмхидхэнэ.

Стартап-һургуулиин мэргэжэлтэ шүүбэришэн Андрей Поскряковой хэлэһээр, Буряад уласай хүнүүд ехэ нэтэрүү.

- Хоёр үдэрэй туршада болбосоролой программа хүтэлөөб. Эгээл һанагдаһан юумэн гэхэдэ, Буряад уласта ямар нэтэрүү хүнүүд гээшэб. Хэмжээ ябуулгын түрүүшын үдэр гушанһаа доошо команда хабаадаа, хоёрдохи үдэртэнь 23 команда үлэһэн байна. Бүхы шахуу команданууд хэмжээ ябуулгада хабаадажа, түсэлөө дүүргэжэ шадаа. Ородой Холбоото Уласай 8 можо нютагта иимэ һургуули эмхидхээб. Тэдэ можонуудта хэмжээ ябуулгын түрүүшын үдэр ажал эхилээд, түгэсхэлэй шатада хабаадагшадай хахадынь үлөөд байгаа, - гэжэ Андрей Поскряков хэлэбэ.

Буряад Уласай үйлэдбэриин болон худалдаа наймаанай яаманай мэдээсэлэй албанай гэрэл зураг