​​Олониитын танхимай гурбадахи бүридэл

Буряад Уласай Олониитын танхим шэнээр бүридхэгдэжэ байна. Үнгэрһэн долоон хоногто Арадай Хуралай үмэнэһөө түлөөлэгшэд элирбэ. Харин Буряад Уласай Толгойлогшо Алексей Цыденов Засагай газарай баталдаг түлөөлэгшэдые апрелиин эхиндэ нэрлээ һэн.

Буряадта Олониитын танхим гурбадахияа бай­гуулагдана гэжэ хэлэлтэй. Нэгэ зарлалай бүридэлдэ 42 хүн хүдэлдэг гээшэ. Тэдэ­нэй 14-ыень Буряадай Тол­гойлогшо, нүгөө 14-ыень Буряадай Арадай Хурал дэбжүүлдэг. Олониитын нэгэдэлнүүд, тэдэнэй можо нютагай таһагууд үлэһэн 14 гэшүүдые һунган абадаг юм.

Ээлжээтэ сесси дээрэ Арадай Хурал өөрынгөө түлөөлэгшэдые нэрлэбэ. Дэбжүүлэгдэһэн 20 хүн сооһоо һунгамалнууд 14- ые шэлэн абаа. Гурбадахи зарлалай Олониитын тан­химда олон мэдээжэ хүнүүд байна. Тэдэ хэд бэ гэбэл, Борис Данилов, Олониитын танхимые хоёрдохи зарлал­да хүтэлжэ ябаһан Баир Бальжиров. Танхимда шэнэ нэрэнүүдшье бии. Жэшээнь, сурбалжалагша Саржана Бадмацыренова, хатарай мэдээжэ багша Виктор Яо- Фун-Тан.

Һонирхолтойнь гэхэдэ, Арадай Хуралай талаһаа байгаали хамгаалдаг олони­итын хамгаалагша Евгений Кислов орожо шадаагүй.

Буряад Уласай Толгой­логшо Алексей Цыденовэй нэрэһээ Олониитын тан­химда хүдэлхэ тухайгаа 27 хүн мэдүүлээ. Хуулиин ёһоор, Буряадай Толгой­логшо оройдоол 14-ыень шэлээ. Эндэшье яһала олон политическэ ажал ябуу­лагшадай нэрэ олохоор. Борис Ботоев, Светлана Хабаркова, Доржа Сыбы­ков гэгшэдэй нэрэнүүдые дуулаагүй хүн олдохогүй. Мүн тиихэдэ залуушуултай үрэ дүнтэйгөөр хүдэлжэ байдаг хүнүүдэй Олони­итын танхимай гэшүүд болоһондонь һайшаалтай. Эдэ хэд бэ гэбэл, дайнай баатар хүбүүдэй нэрэ бу­саадаг Ородой бэдэрэлгын нэгэдэлэй хүтэлбэрилэгшэ Владимир Ефремов, оюута­дай барилгын эмхинүүдһээ Елена Занданова, Буряадай һайн дуратанай эблэлэй түлөөлэгшэ Ирина Пахо­мова болон бусад болоно. Эрэмдэг бэетэйшүүлэй талаһаа Галина Горбатых гэшүүдэй тоодо ороһониинь гайхалгүй. Мүн тиихэдэ ша­жан мүргэлэй нэгэдэлнүүд баһа өөрын түлөөлэгшэдтэй болоо. Солбон лама Аюшеев болон Алексий эсэгэ Шев­цов Олониитын танхимда хүдэлхэ.

Май һарада олониитын нэгэдэлнүүд, тэдэнэй можо нютагай таһагууд өөһэдын 14 гэшүүдые нэрлэхэ. Гур­бадахи зарлалай Олониитын танхим июнь соо ажа­лаа эхилхээр хараална. Мүнөөнэй гэшүүд гурбан жэлээр һунгагдаа гээд хэ­лэлтэй.

Буряад Уласай Арадай Хуралай мэдээсэлэй албанай гэрэл зураг