1050
Майн 9-нэй үдэр Ородой Холбоото Улас дотор Агууехэ Илалтын үдэр тэмдэглэгдэдэг. Иллатын үдэртэ дашарамдуулан, Улаан-Үдэдэ табинһаа дээшэ хэмжээ ябуулганууд эмхидхэгдэхэ.
Майн 8-да Илалтын хүшөөгэй дэргэдэ баяр митинг болон сэсэгүүдые табиха ёһолол үдэрэй 13 сагта эмхидхэгдэхэ. «Агууехэ тэрэ жэлнүүдтэ һүгэдэнэбди» гэһэн тоглолтодо арадай дуу, хатарай «Забава» театр, мүнөө үеын хатарай «Угол Зрения» театр, зохёохы бүлгэмүүд, уралигай һургуулинуудай, соёлой-сүлөө сагаа үнгэргэлгын түбүүдэй түлөөлэгшэд, юнармейцүүд, сэрэгшэд хабаадаха.
Энэл үдэр «Трамвай Победы» гэһэн акци эмхидхэгдэхэ. Тиихэдэ 2-дохи маршрудаар ябадаг трамвайнуудта 1940-өөд онуудай сэрэгэй үзэсхэлэн дэлгэгдэжэ, сэрэгэй госпиталь болон штаб байгуулагдаха. Олондо мэдээжэ дуунуудшье зэдэлхэ.
Илалтын үдэр, майн 9-дэ, ниислэл хотын түб талмайда үглөөнэй 10 сагта сэрэгэй парад эмхидхэгдэхэ. Тус хэмжээ ябуулгада Зүүн зүгэй сэрэгэй тойрогой 1200-һаа дээшэ сэрэгшэд болон 50-һаа дээшэ сэрэгэй техникэ хабадааха. Тиихэдэ Эсэгэ ороноо хамгаалгын Агууехэ дайнай үеын автомобильнууд ажаһуугшадта харуулагдаха.
Заншалта болоһон «Хэтэ мүнхын жагсаалда» Буряадай ажаһуугшад энэ үдэр хабаадаха аргатай. Улаан-Үдэдэ хэмжээ ябуулгада 25 мянга тухай хүн хабаадаха гэжэ багсаамжалагдана. «Хэтэ мүнхын жагсаалда» хабаадагшад үглөөнэй 9.30 сагһаа 11 болотор Ранжуровай гудамжада оршодог Буряадай гүрэнэй ехэ һургуулиин дэргэдэ сугларжа, сэрэгэй парадай удаа Илалтын хүшөө хүрэтэр алхалха. Тус хэмжээ ябуулга эмхидхэлгэдэ «Илалтын волонтёрнууд» гэһэн хүдэлөөнэй 600-гаад хүн хабаадалсаха юм.
Улаан-Үдын ажаһуугшад болон айлшад «сэрэгшын каша» амталжа, «Спасибо за Победу!» гэһэн тоглолто хаража, «Синий платочек» гэһэн бүхэроссин акцида хабаадаха аргатай. Энэ хэмжээ ябуулгада хабаадагшад Клавдия Шульженкын дуун доро хатарха юм.
Соведүүдэй талмайда үдэрэй 15 сагһаа 17 болотор «Рекорд Победы» гэһэн уласхоорондын тамирай хэмжээ ябуулга заншалта ёһоор эмхидхэгдэхэ.
Орешковой, Жанаевай нэрэмжэтэ болон «Юбилейный» паркнуудта баһал баярай хэмжээ ябуулганууд үнгэрхэ.
Үдэшын 19 сагһаа Соведүүдэй талмай дээрэ «Победный май» гэһэн баярай тоглолто эмхидхэгдэхэ. Энэ хэмжээ ябуулгада Чингис Раднаев, Ирина Шагдурова, Валико Гаспарян, «Лаккитон» бүлгэм, Сергей Плотников гэгшэд хабаадаха.
Анна Огороднигой гэрэл зураг
