​​Буряад Уласай Захаамин аймагта нарайлалгын гэр баригдаха

Захаамин аймагта Алас Дурна зүгэй дэмжэлгын мүнгөөр нарайлалгын гэр шэнээр бодхоогдохонь. Тус аймагаар албанай хэрэгээр Буряад Уласай Толгойлогшо Алексей Цыденов ябахадаа, иимэ баяртай мэдээсэл дуулгаа.

Хүнгэрхэеэ байһан эхэнэрнүүд эртээнһээ ниислэл хото ошодог байгаа. Юундэб гэхэдэ, тэндэхи нарайлалгын байшан орёо байдалда оронхой, хаяа ханань, үһээниинь унашахаар шахуу болонхой. Гадна нарайлха эхэнэрые ниислэл хүрэтэр дары абаашаха гэбэл, харгынь муу. Авто-унаагай дэншээнһээ боложо, харгыдаа түрэжэшье магадгүй бшуу.

Закаменск хотодо нарайлалгын гэр аяар 1957 ондо баригдаа. Тэрэ гэһээр нэгэшье заһабарилагдаагүй юм. Олон жэлэй хугасаада захааминаархид энэ асуудалые Засагай газарай урда табина, ноёд һайдта дуулгана. Теэд мүнөө болотор энэ бэрхэшээл шиидхэгдэнгүй байгаа бшуу. 

Анна Огороднигой гэрэл зураг