​​Уян нугархайгаараа уладые гайхуулаа

Буряадай уласай циркын һургуулиин шабинар «Алле-Ап - 2019» гэһэн бүхэроссиин урилдаан-харалгада ехэ амжалта туйлаба. Баясана Галтаева, Юлия Жербакова болон Дарья Чемитова гэгшэд I шатын дипломдо хүртөө.

Циркын байгуулагдаһаар 100 жэлэй ойдо зорюулагдаһан «Алле-Ап - 2019» гэһэн Бүхэроссиин урилдаан-харалга Челябинск хотодо үнгэрөө. Ород гүрэнэй 35 хотын 48 циркын бүлгэмүүд хоёр үдэрэй туршада эмхидхэгшэдэй анхаралда 180 гаран номер дурадхаа. Оройдоол 15-иинь һүүлшын Гала-тоглолтодо оруулагдаа. Буряадай цир-кын һургуулиин шабинарай тэдэнэй тоодо байһанда омогорхомоор.

“Тигрята” гэһэн “каучук” маягаар уян нугархай басагадай табиһан номер олондо һайшаагдаа. Хүтэлбэрилэгшэ Наталья Афанасьева, эквилибристикын багша Энхжаргал Энхцацрал болон хатарай багша Марина Цыбикжапова гэгшэдэй зохёоһон энэ номерто Баясана Галтаева, Юлия Жербакова болон Дарья Чемитова гэгшэд хабаадана. 8-10 наһанай үхибүүдэй бүлэгтэ тэдэ I шатын диплом абажа, олон тоото түрэлхидөө баясуулаа.

Гэхэтэй хамта, үхибүүдэй дунда хэн эгээл удаан гар дээрээ байхаб гэһэн мүрысөөн болоо. Эндэ Баясана Галтаева түрүүшүүлэй тоодо ороо. 

Буряадай циркын һургуулиин гэрэл зураг