1101
Үнгэрһэн амаралтын үдэрнүүдтэБуряадуласай Загарай, Кабанск, Сэлэнгэ, Байгал шадарай аймагуудта ойн 7 түймэр унтарааха талаар ажал ябуулагдаа. Тэлдэнэй 6-иинь сарагдаһан байна.
Майн 20-ной үглөөнэй мэдээсэлээр, Сэлэнгэ аймагта 75 гектар газарта гараһан түймэр сарагдана. Түймэр унтараалгада бүхыдөө 90-һээ дээшэ ойн харуулшад, десантнигууд, ой ашаглагшад хабаадана. Тиихэдэ түймэр саралгын техникэ хэрэглэгдэнэ.
Түймэрэй аюултай хаһын эхилһэн сагһаа хойшо Буряад уласта 52 мянган гектар талмайда 209 түймэр гараһан байна. 2018 оной энэл сагай мэдээсэлэй ёһоор, уласай дэбисхэртэ 8,9 мянган гектар талмайда 168 түймэр гараа гэжэ бүридхэлдэ абтаһан байха юм.
Буряад уласта түймэр һэргылхэ талаар ажал эдэбхитэй ябуулагдана. Үнгэһэн амаралтын үдэрнүүдтэ түймэр һэргылхэ дүримүүд сахигдана гү гэжэ шалгалтанууд эмхидхэгдэһэн байна. Тиигэжэ дүрим эбдэһэн 57 ушар бүридхэлдэ абтаа. Түймэрэй аюултай хаһын эхилһэн сагһаа хойшо дүрим эбдэһэн 1186 ушар элирүүлэгдэжэ, дүрим эбдэгшэдтэ 1,3 сая түхэригэй яла тохогдоо.
Буряадай дэбисхэртэ түймэрэй аюултай хаһын онсо гурим соносхогдонхой гэжэ ойн харуулшад һануулна. Онсо гуримай үедэ ойдо орохо, хагда, бог шорой галдаха, түүдэг носоохо хоригдоно. Эдэ дүримүүдтэ хайша хэрэгээр хандаһан эрхэтэд 4 000-һаа 5 000 хүрэтэр, харюусалгата нюурнууд 20 000-һаа 40 000 хүрэтэр, юридическэ нюурнууд 300 000-һаа 500 000 хүрэтэр ялада тохогдохо юм.
Түймэрэй гараһан тухай дүтын ойн ажахыда гү, али (83012) 20-44-44 гэһэн утаһаар дуулгынт гэжэ ойн харуулшад ажаһуугшадта хандана.
