853
Байгша оной июниин 5-6-най үдэрнүүдтэ Буряад уласта үүлтэртэ хони, ямаадай Сибириин-Алас Дурна зүгэй үзэсхэлэн анха түрүүшынхиеэ эмхидхэгдэхэнь. Энэ хэмжээ ябуулгада Сибириин болон Алас Дурна зүгэй можо нютагуудай хони үсхэбэрилгын түрүү ажахынуудай хүтэлбэрилэгшэд, мэргэжэлтэд хабаадаха. Алтай болон Үбэр Байгалай хизаарнуудай, Тыва, Хакаси, Алтай, Буряад уласай 34 ажахы хэмжээ ябуулгада хабаадаха гэжэ багсаамжалагдана. Можонууд хоорондын хэмжээ ябуулга Ородой Холбоото Уласай Хүдөө ажахын яаман болон Буряад Уласай Засагай эмхидхэнэ.
Үбэр Байгалай нарин нооһото, романовска, горноалтайн, баруун Сибириин мяханай, «Бүүбэй», монгол, шэрүүн нооһотой буряад үүлтэрэй хонидые үзэсхэлэндэ харахаар.
Ородой Холбоото Уласай хони үсхэбэрилгын үндэһэтэнэй эблэлэй, хүдөө ажахын яамануудай түлөөлэгшэд, эрдэмтэд мэргэжэлтэ шүүбэришэд боложо, үүлтэртэ малай шанар шэнжэ шалгаха юм. Эрхим ажахыда «Шевроле Нива» гэһэн гол шан барюулагдаха. 2-дахи, 3-дахи һууринуудые эзэлһэн ажахынууд нооһо хайшалха машина болон чипүүдые шалгаха сканернуудаар шагнагдаха.
Үзэсхэлэнэй үедэ хони, ямаа үсхэбэрилгэ хүгжөөлгын байдал, түсэбүүд болон гүрэнһөө гадуур худалдаха асуудалнуудаар зүблөөөн үнгэргэгдэхэ. Тиихэдэ хүдөө ажахын техникэ болон тоног хэрэгсэлнүүд, малай эм дом болон бусад һалбаринуудаар таһагууд ажал ябуулха. Хэмжээ ябуулгада нооһо хайшалагшад мүрысэжэ, «Нооһон оперо» гэһэн нооһор бүтээһэн хубсаһан, эд бараан харуулагдаха, «Хотошо» үүлтэрэй нохойнууд олоной һонирхол таттаха байха.
Фермернүүд болон эмхинүүд амитадые, техникэ болн бусадшье хэрэгтэй зүйлнүүдээ худалдажа абаха талаар хэлсээнүүдые баталха аргатай юм. Харагшад нооһо хайшалалгаар, нооһо даралгаар, «hээр шаалгаар», номо һуршаар мастер-классуудта хабаадажа, эдеэ хоол худалдан абажа болоно.
Уралай саанахи дэбисхэртэ эмхидхэгдэһэн үүлтэртэ хони ямаадай үзэсхэлэн хадаа эгээл томо хэмжээ ябуулгануудай нэгэн болоно. Тиимэһээ Ородой Холбоото Уласай дэбисхэртэ хони, ямаа үсхэбэрилгын һалбарида ехэ удха шанартай гээд тэмдэглэлтэй. Буряад уласай ажахынууд тус үзэсхэлэндэ бэлэдхэл эхилэнхэй.
«Россельхозбанк», «Бурятмяспром», «Бурятагроснаб», «Биотехнологии», «Буян» бүлгэүүд болон олзын хэрэг эрхилэгшэ Степан Башкуев хэмжээ ябуулгын эбээн тэдхэгшэд юм. Улаан-Үдэ-Хяагта харгыда үүлтэртэ хони, ямаадай Сибириин-Алас Дурна зүгэй үзэсхэлэн дэлгэгдэхэ.
Анна Огороднигой гэрэл зураг
