​​Хоёр каналай орондо - хориие

Июниин 3-һаа Буряад Улас тоото (цифровой) гуримаар телевизор хаража эхилхэ. Үсэгэлдэр Буряадай телевидениин байшан соо шэнэ маягаар дамжуул­ха түхеэрэлгэ туршагдаба.

Тоото гуримаар ажал ябуулха тус­хай мэргэжэлтэд Москваһаа аяар 8 һарын саана Буряадай телевидени ерэжэ, ехэ ажалай эхи табижа үгэһэн юм. Шэнэ оньһото түхеэрэлгэ тодхог­дожо, саашадаа энэ бүридхэл таару­улха, нэгэшье һаадгүй ажалладаг бол­гохо бэлэдхэлэй ажал түгэсэбэ гээшэ. Түхеэрэлгын тодхоотой энэ танхим бүхы цифровой бүридхэлэй зүрхэн болоно гээшэ. Энээн соо бүхы ажал­та һууринуудые нэгэдүүлһэн сервер табяатай. HD-түхэлөөр буулгагдаһан бүхы дамжуулганууд эндэ хэдэн ар­баад жэлнүүдэй хугасаада хадагалаа­тай байха. Эндэ монтаж, эфир табидаг түхеэрэлгэ, видео-буулгабари, микро­фон гээд хэрэгсэлнүүдэй хахадынь булта Ород гүрэндэ бүтээгдэһэн. Тии­мэл хадаа найдамтай гэжэ ВГТРК-гай можын телевидениин хүтэлбэриин дарга Илья Лебедев онсолбо.

Цифровой гуримда бэлдэлгэ энэл сагай хугасаада Буряадай радиодо ябуулагдаһан байна. Эндэ ажаллаха таһагууд булта шэнэ үеын оньһото түхеэрэлгэнүүдээр хангагдаа, сурбал­жалагшад тэрээндэнь угаа урматай.

Дамжуулганууд сэхэ утаһаар та­бигдаха, уридшалан буулгаха ажал хэгдэхэгүй. Тиимэһээ мэдээсэл тон шэнэ үеынхеэр шууд дамжуулагдажа байха. Энэнь хадаа дамжуулганууд ямаршье һаадгүйгөөр, шуяагүйгөөр, шанар һайтайгаар, алдуугүйгөөр ябуулагдаха болоно. Радиогой шэнэ түхеэрэлгэнүүд баһал Ород гүрэндэ үйлэдбэрилэгдэһэн, тиимэһээ шанар­тай байха. Тиимэл хадаа телевизор ха­рагшадта болон радио-шагнагшадта һайн болобо гээшэ.

Телевидениин сэтгүүлшэд бо­лон найруулагшадай шэнэ ажалта һууринууд бии болоо. Тэрэнэй түлөө news-room нээгдэжэ, шэнэ оньһото түхеэрэлгэнүүд абтаа. Энэ хэрэг түргэдүүлжэ, һайн шанартай болгоно. Һарын туршада телевидениин ажал­шад дүршэжэ, һуралсал гараа. Буряадай гүрэнэй телевидениин захиралай орлогшо Тимур Санжиевай хэлэһээр, дамжуулга бэлдэлгын бүхы алхамууд бүридхэгдэжэ, автомадай түхэлдэ ору­улагдана.

- Зурагуудые буулгахаһаа эхилэ­эд, һонин бэшэхэ, найруулха, эфиртэ табилга хүрэтэр ажал хүнгэдхэгдэнэ. Тиигэжэ зурагуудай буулгабаришье һайжарна, мэдээсэлшье угаа һонин болохо бшуу, - гэжэ Тимур Санжиев хэ­лэбэ.

Тоото гуримда оролго хэзээдэ­шье манай ажаһуугшадай байдал һайжаруулна ха юм даа. Гэхэ зуура, Ородой Холбоото Уласай хэмжээн­дэ Буряадай телевидени гансаараа оролсоно. Харин Ариг Ус, Тивиком, АТВ, Мир-Бурятия гэжэ каналнууд энэ түхэлэй бүридэлдэ ороногүй. Эдэ дам­жуулгануудые хараха гэбэл, телевизо­рэйнгээ хуушан антеннэ дахин мушха­жа хараха аргатайт.

Гэбэшье, холо хүдөөдэ ажаһуудаг зон хоёр каналай орондо 20 канал түлбэригүйгөөр хараха аргатай боло­бо. 2012 онһоо урда тээ бүтээгдэһэн телевизор цифровой дохёо бариха аргагүй. Тиимэһээ баһал приставка түхеэрэлгэ абажа хэрэглэхэ болоно. Дайнай болон ара талын ветерану­удта тэрэнь миинтээр үгтэхэ, харин социальна туһаламжада хүртэхэ эрхэ­тэй зондо тэрэ түхеэрэлгэ худалдажа абаһан мүнгэниинь бусаагдаха.