​​Хангалтама хилээмээр хангана

Хориин түбтэ хубиин хэрэг эрхилэгшэ Елена Белых «Тили-тили-тесто» гэжэ шэнэ цех магазинтайгаар нээбэ.

Энэ хүхюутэйхэн нэрэ тэрэнэй дүү басаган Та­тьяна һанажа, энэ багахан үйлэдбэриин булта ажал­шадта һайшаагдаа. Эдэ ажал­шадые нэрлэбэл: Лидия Ильинична Новикова, Елена Григорьевна Спиридонова, Надежда Валентиновна Бу­лыгина болон Елена Ильи­нична өөрөө хүдэлнэ.

Тэдэнэр нэн түрүүн байшан худалдажа аба­ад, үнгэрһэн намар заһабарилжа эхилээ. Тэдэн­дэ түрэл гаралнуудынь ехэ туһа хүргөө. Зайн гал, дулаа Еленын наһанайнь нүхэр Василий гартаа дүйтэй тула оруулаа. Тиигээд лэ шэнэ хэрэгсэлнүүдые – электро­пеэшэн, миксернүүдые, талха худхагшые абаа. Нэгэ миксер 50 мянган түхэригтэ гэхэдэ, хэды ехэ мүнгэ зөөри энэ хэрэгтэ оруулааб гэжэ ойлгосотой. Эгээл шухала хэрэг – бүхы саарһа дансану­уд саг соогоо бүтээгдээ.

Елена Ильинична­гай хэлэһээр, «Тили-тили-тесто» хэдэн янзын хилээмэнэй зүйлнүүдые, тэрэ тоодо амтатайхан кекс, пряник, песоч­ник, торт, пирожки­нуудые барина. Тии­хэдэ хүнүүдэй болон эмхи зургаануудай захилаар элдэбын найр наадануудта зорюулһан амта­тайхан хоолнуудые бэлдэнэ. Мүн баһа өөрынгөө аймагһаа гадуур хүршэ аймагу­удай дэлгүүрнүүдтэй хэлсээнүүдые бата­ланхай.

Иимэ ажал ябуулдаг бүхы үйлэдбэринүүдтэл, «Тили- тили-тесто» хоёр халаанда хүдэлнэ. Тиимэһээ нютага­архид һаяхана баригдаһан хилээмэнэй зүйл хэзээдэшье абаха аргатай. Ондоо тээһээ хүниие гуйлтагүйгөөр хуби­ин авто-унаагаар бариһан зүйлнүүдээ дэлгүүрнүүдтэ хүргэнэ.

Хилээмэ барилгын шэнэ үйлэдбэриин нээгдэхэдэ, хүн зондомнай, юрэнхыдөө ниигэмэй ажабайдалда тон ехэ удха шанартай гэжэ Хори аймагай Һунгамалнуудай зүблэлэй түрүүлэгшэ Вален­тина Салдруева тэмдэглээ. Елена Ильиничнагай шада­мар бэрхые тэмдэглэхэдээ, Валентина Резвановна хэдэн хүнүүдые ажалтай болгожо, арад зоноо бүхы эдеэ хоолой дээжэ болохо хилээмээр хан­гажа байһантнай ехэл һайн, аша буянтай ажал гэжэ баяр­тайгаар мэдүүлээ.

Баир БОРБОЕВОЙ гэрэл зураг