​​Эрхим һурагшадта - нэрэмжэтэ шангууд

Алдарта Герой Далай Гунгаев 2019 оной жэлэй эрхим һурагша Санжита Аюровада шан барюулна

Һүүлшын хонхын һайндэр гүрэн дотор хаа-хаанагүй үнгэрбэ. Мүнөө жэл түрэһэн нютаг Согто-Хангилайнгаа дунда һургуулиин һайндэртэ хабаадалсабаб.

Үдэрэй 11.00 сагта дунда һургуулиин актова танхим соо айлшад суглараад, мүнөө һургуули дүүргэжэ байһан залуушуулые халуун альга ташалгаар угтан абаба.

Байгша ондо Согто-Хангилай дунда һургуули дүүргэгшэд

Байгша ондо Согто-Хангилай дунда һургуули оройдоол 7 һурагша түгэсхэбэ. Эдэ хэды жэлнүүдэй хугасаада һургуулинуудта үхибүүдэй тоо үсөөн байһанаа, һүүлэй жэлнүүдтэ “Путинай” үхибүүд энэ орёохон байдал һайжаруулаа гэлтэй. Нёдондо Могойтын аймагай домог суута Догойн дунда һургуулиие 1 һурагша дүүргэһэн юм. Энэ үйлын гол шалтагааниинь гэбэл, 11-дэхи ангиие дүүргэгшэдэй зариманиинь ЕГЭ шалгалтаһаа айжа, 9-дэхи ангиин һүүлээр дунда мэргэжэлэй һургуулида орожо, үсөөниинь лэ һургуулияа бүрин дүүргэнэ ха.

Һургуулиин захирал Цырендаши Гунгаев эрхим һурагшадые ёһолбо

Согто-Хангилай дунда һургуулиин захирал Цырендаши Гунгаев өөрөө энэл һургуули дүүргэһэн юм. Дээдэ һургуулияа дүүргэһээр лэ, түрэл нютагаа бусажа, амжалтатай хүдэлнэ. Һүүлшын хонхын һайндэртэ һурагшадаа, багшанараа болон ойн баярта жэлнүүдэй һурагшадые, нютагайхидаа хани халуунаар амаршалжа, мүнөөдэрэй байдалаар һургуулиин амжалтануудтай танилсуулжа, эрхим багшанар, һурагшад тухай мэдээсэбэ.

Ага тойрогой захиргаанай гол мэргэжэлтэн Цыржин Жалсандоржиева бүгэдэниие амаршалжа, мүнөө жэл бүхыдөө Ага тойрогой дунда һургуулинуудые хамта дээрээ 667 һурагша түгэсэбэ гэжэ тэмдэглээ.

Ага аймагай захиргаанай зүгһөө Олимпиин нааданай абарга, Ородой Холбоото Уласай габьяата тамиршан Тимур Тучинов баярай үгэ хэлээ. Ага аймагай хүтэлбэрилэгшын заншалта шангууд 5-дахиһаа 11-дэхи анги хүрэтэр эрхим һурагшадта барюулагдадаг байна. Согто-Хангил һуурингай захиргаанай зүгһөө баһал эрхим багшанарта, шабинарта шангууд барюулагдадаг заншалтай.

Олимпиин абарга Тимур Тучинов Агын аймагай зүгһөө эрхим һурагшада шан барюулба

Һүүлэй үедэ нютагайнгаа соло ехэтэй зоной нэрэтэ шангууд жэл бүри эрхим һурагшадта олгогдодог болонхой. Эгээл иимэ шан Зугаалайн долоон жэлэй һургуулиие дайнай үедэ ганса “5” сэгнэлтээр дүүргэһэн Балма Дамбаевагай үхибүүд аяар 9 жэлэй саана бии болгоо бэлэй. Урдахи жэлынь Догойн дунда һургуулида эгээл эрхим һурагшада лётчик-испытатель Дашанима Базаровай нэрэмжэтэ шан бии болгоо һэн. Эндэһээл эхилжэ, мүнөө һургуули бүхэн нэрэтэ шангуудые эрхим һурагшадта жэл бүри үгэдэг болоһониинь һайшаалтай. Хоёрдохи жэлээ Россиин Ажалай Герой Далай Гунгаев “Жэлэй һурагша” гэһэн шэглэл байгуулжа, шан барюулдаг юм. Энэ шанда хоёрдохиёо 10-дахи ангиин һурагша Санжита Аюрова хүртэнэ. Согто-Хангилһаа урган гараһан мэдээжэ тамиршад Жамсо Лхамажапов ба Арсалан Будажапов өөрынгөө нэрэтэ шангуудые нютагайнгаа эрхим тамиршадта үгэдэг байна. Мүнөө жэлһээ тоо бодолгын талаар шалгарһан эрхим һурагшадта энэл һургуули дүүргэһэн Светлана Цыбенова өөрынгөө нэрэтэ шан байгуулба. Светлана Батожаргаловна хадаа 1991 ондо Согто-Хангилай дунда һургуули дүүргээд, Красноярскын ехэ һургуулиин оюутан болоһон юм. 25 наһатайдаа техническэ эрдэмэй кандидат болоһон. 2009 ондо Москвагай багшанарай ехэ һургуулиин дэргэдэ байгуулагдаһан шэнэ кафедрые даагшаар томилогдоһон юм. 36-тайдаа физикэ болон тоо бодолгын эрдэмэй доктор болоо. Мүнөө Светлана Цыбенова Россиин эрдэмэй академиин дэргэдэхи биолого-химическэ институдай эрдэмэй түрүү хүдэлмэрилэгшэ. Энэ шанда Согто-Хангилай дунда һургуулиие дүүргэгшэ Бадма Содномдашиев хүртэбэ.

Светлана Цыбенова өөрынгөө нэрэтэ шан Бадма Содномдашиевта барюулба 

Һүүлшын хонхын һайндэрэй хэмжээндэ тус һургуули 20-30-40-50 жэлнүүдэй саана дүүргэгшэдэй уулзалга үнгэрөө. 50 жэлэй саана дүүргэгшэд бултанһаа олоор суглараа. Тэрэ сагта һургуули найман жэлэй байһан хадаа 2 выпуск нэгэдүүлһэн байгаа. 40 жэлэй саана минии үетэн 56 хүн энэ һургуули дүүргээ бэлэйбди. Тэрэ сагта 8-дахи класс дүүргээд, олон үхибүүднай дунда мэргэжэлэй һургуулида ородог, мүн хамтын ажалда хүдэлжэ эхилдэг һэн. Тэдэ нүхэдтэеэ бүгэдыень тоолобол, 72 хүн һураа гэлтэй. Тэрэ сагта нилээн олон үхибүүд һургуулида һурадаг һэн. Выпуск бүхэн һургуулидаа, заалгаһан багшанартаа бэлэг үгэдэг заншалтай. 1979, 1989, 1999 ондо һургуули түгэсэгшэд нэгэдэжэ, түрэл һургуулиингаа хашаа хорёо түмэрөөр уран һайханаар бүтээжэ, бэлэг баряабди.

Цырегма Сампиловагай гэрэл зурагууд