782
Мүнөөдэр, майн 30-да, Буряад уласай үдэр байгуулха тухай 2017 ондо, тиихэдэ үшөө Буряад Уласай Толгойлогшын уялга дүүргэжэ байһан Алексей Цыденов тогтоол абаһан байна гэжэ һануулнабди.
Буряад-Монголой Автономито Совет Социалис Республика 1923 оной майн 30-да ВЦИК-эй президиумэй тогтоолоор байгуулагдаһан түүхэтэй. Тиигэжэ РСФСР-эй бүридэлдэ БМАССР Верхнеудинск ниислэл хототой байгуулагдаа. Верхнеудинск хото 1934 ондо Улаан-Үдэ гэжэ нэрлэгдээ. Удаань 1958 оной июль һарада уласнай Буряадай АССР гэһэн нэрэтэй болоһон юм.
1923 оной мэдээсэлээр, БМАССР-тэ 450 мянган хүн ажаһуугаа, тэдэнэй 49%-нь – буряадууд. 2349 һууринууд тоологдодог байгаа. Тиихэдэ Верхнеудинск, Селенгинск, Баргажан, Троицкосавск (мүнөө Хяагта) хотонуудта оройдоол 33 мянган хүн ажаһуугаа.
1925 ондо улас дотор ажаһуугшадай 90 хубинь хүдөө ажахын һалбарида хабаатай байһан юм. Уласай байгуулагдаһан түрүүшын жэлдэ 16 үйлэдбэри хүдэлжэ байгаа.
Мүнөө Буряад уласай талмай хадаа 351,3 мянган дүрбэлжэн модон болоно, ажаһуугшадай тоо – 983 мянганһаа дээшэ. Тиихэдэ хотонуудта ажаһуугшадай 59,09 хубинь тоологдоно. Буряад уласта Бабушкин, Гусиноозёрск, Закаменск, Хяагта, Северобайкальск, Улаан-Үдэ гэһэн 6 хото бии юм.
(Буряад уласай түүхын баримтануудые эндэ хаража болоно)
