​​Баярай бэшэг

Эмшэдэй һайндэрэй дүтэлхэдэ, “Буряад үнэндэмнай” Улаан-Үдын Железнодо­рожно хороогой Ревматологическа таһагта эмшэлүүлжэ байһан ажалай вете­рануудай Баярай бэшэг ерэжэ урмашуулба.

Наһатай боложо, үтэлхын далайе гатал­ха гээшэ юрын хэрэг бэшэ. Хүл гар, үе мүсэ, нюрга һээр гээд лэ, захаһаа яншажа эхилдэг. Тиимэһээ үри үхибүүдээ зобоонгүй, яажа үндэр наһаяа тойбогүйгөөр үнгэргэхэб гэжэ наһатайшуул һанаа үнөөн болодог. Харин тиихэдэ мүнөө гүрэн түрэмнайшье, эгээл һайниинь гэхэдэ, эмшэднай эдэ зондо һаналаа табижа, ехэтэ анхарна гэжэ ветеранууд тэмдэ­глэнэ.

- Эндэ юрын массажһаа эхилээд, мүнөө сагай генно-инженернэ биологиин арга­ар эмнүүлнэб, - гэжэ Зинаида Намбарова хөөрэнэ: – Хүл дээрээ ябажа, өөрөө сайгаа шанаад байха гээшэ ямар ехэ жаргал гээшэб. Эмшэдтэ, тэдэниие ударидадаг Аюна Бим­баевнада гүнзэгы баяраа мэдүүлэн, доро до­хижо байһанаа II группын инвалид Зинаида Ильинична мэдүүлнэ.

Заха холын Захааминай Сахирай баг­шын ажалай ветеран Донара Будаева ар­шаан булагта дайдада байдагшье һаа, мүнөөнэй бэрхэ эмшэдгүйгөөр хүл дээрээ ябахамнай хүшэр лэ даа гэжэ бэшэнэ. Хүндэ үбшэндэ дайрагдаһыемни нютагаймни эм­шэд ойлгожо, иимэ һайн эмнэлгын газарта эльгээһэндэнь баяртайб гэжэ Донара Санжи­евна дахин-дахин дабтана.

- 2014 онһоо хүдэлжэ эхилһэн юм бай­на. Тиихэдээ горитой ехэ амжалта туйлаа гэжэ эндэ эмшэлүүлһэн хүнүүд баяртайгаар хөөрэнэ. Эндэ эмнүүлжэ байхадаа, Аюна Бим­баевнагай болон бүхы коллективэйнь анха­ралда дүүрэн хүртэнэб. Бэе махабадайнгаа заһарһанда тон ехэ баяртайб, - гэжэ партиин ажалай ветеран Владимир Порхоев тэмдэглэ­нэ.

Владимир Дашеевич дулаан гартай, зөөлэн үгэтэй, уужам сэдьхэлтэй, дэлгэр хандасатай ревматолог эмшэдтэ - Светлана Дугаровна Асалханова, Дарима Арсалановна Дугаржа­пова, Ирина Дармаевна Дармаева гэгшэдтэ гүнзэгы баяраа мэдүүлнэ. Харюусалгата ту­шаалда хүдэлжэ ябахадаа, хүн зоной элүүрые хамгаалгын һалбариие тон һайнаар ойлгохо болоһон хүндэтэ хүтэлбэрилэгшэ-ветеранай һанамжа тон сэнтэй.