1062
Буряадай Толгойлогшо Алексей Цыденов уласайнгаа эдэбхитэй залуушуултай - КВН-эй гэшүүд, волонтёрнууд болон Бүхэроссиин оюутадай фестивальда хабаадагшадтай уулзаба. Алексей Самбуевич Буряадай Засагай газарай ажал хэрэгүүд тухай, мүн тиихэдэ залуушуулай ажабайдал һайжаруулха талаар абтажа байһан хэмжээнүүд тухай хөөрэжэ үгөө.
- Уластамнай залуушуулай ажабайдал һайжаруулхын тула ехэ юумэн хэгдэнэ. Илангаяа ажалаар хангахаяа оролдонобди: олон һургуулинууд, хүүгэдэй сэсэрлигүүд бодхоогдоно, шубуунай фабрика баригдана. Москвагай авиационно институдай филиал нээгдэхэ, ЛВРЗ болон Авиазаводто шэнэ хараа түсэбүүд абтанхай. Энэдхэг ба Урда Солонгос гүрэнүүдэй инвесторнүүд эндэмнай эмшэлэлгын хэрэгсэлнүүдые бүтээдэг завод бариха арга боломжоор ехэ һонирхоно. Тиихэдээ манда дунда мэргэжэлтэй ажалшад дуталдана. Сэбэр сэхэ, сэсэн ухаатай, ажалша, алтан гартай залуушуул хэрэгтэй, - гэжэ Алексей Цыденов онсолоо.
Энэ уулзалгын үедэ уласай Толгойлогшо “Оюутадай хабар - 2019” гэһэн Бүхэроссиин фестивальда Буряадаа түлөөлжэ, арбан шангай һууринуудые эзэлһэн хүбүүд басагадтай танилсаа. Тэдэ ээлжээтэ хэмжээ ябуулгые Улаан-Үдэдэ үнгэргэхые дурадхаа.
- 2022 он болотор ехэ хэмжээ ябуулгануудые үнгэргэхөөр талмайнууднай олошорхо - 4000 һууритай мүльһэн ордон, “Байгал” театрай байшан баригдаха. Тиимэ хадань мэдүүлгэ оруулаял, - гэжэ Алексей Цыденов дэмжээ.
КВН наададаг залуушуул шиидхэгдээгүй асуудалнууд тухайгаа хөөрэжэ үгөө. Уласаймнай команданууд можонууд хоорондын хэмжээнэй мүрысөөнүүдтэ ходо амжалта туйладаг юм гэжэ һануулая. Тэдэ Москва, Казань хотонуудта үнгэргэгдэхэ КВН-эй наадануудта Алексей Цыденовые уряа.
Мүнөө жэлдэ цифровой телевидени нэбтэрүүлгэдэ туһалха Буряадай волонтёрнуудай ехэ эмхи байгуулагдаһан юм. Эндэ дунда мэргэжэлэй һургуулинуудай 600 гаран оюутад тоологдоно. Тэдэ гар утаһаар гү, али гэр бараандань ошожо, наһатай зондо туһалһан байна.
Уулзалгын түгэсхэлдэ залуушуул уласай Залуушуулай түб байгуулха талмайгаар туһалхыень Алексей Цыденовые гуйгаа.
Автор: Долгорма БАДМАЕВА
