Түрэхэһөө дүрбэн тэгшэ бэлигтэй эрхим найруулагша Эдуард Будаевай бэлиг шадабаритайнь хүндэтэ уншагшадаа танилсуулха золтой байһандаа баясанаб.
Яаблан хадын шэлые үргэл жэлүүлһэн Баян-Хонгор хадын доро нэмжыгшэ Иисэнгэ нуурай эрьедэ хүгжэлтын замаар бэхижэжэ байһан нютагта уран зохёолшо, сэтгүүлшэн, ирагуу найрагша Эдуард Будаев 73 жэлэй саана түрөө һэн. Багадаа ехэ үбшэндэ дайрагдахадань, Шулуун-Дугар гэжэ нэрэ үгэһэн юм.
Шулуун-Дугарай намтар “Алтан гүүртэ” гэжэ фермэдэхи Будын Дансарантан гэжэ айлайда хүбүүниинь болоһонһоо эхилдэг. Тэрэ намартаа Зазын эхин, удаань Иисэнгын 8 жэлэй, Гүүндын 11 жэлэй һургуулинуудта һураа. Иисэнгэдэ Цырендулма Дондогойн уран зохёолой кружогой гэшүүн байгаа. Гүүндын һургуулида фотоэтюд буулгаха, аймагайнгаа сониндо бэшэхэ, илангаяа ханын сонин гаргалгада эгээл эдэбхитэйгээр ябаа. Валентина Андреевна Токарева захирал уран зохёолшодые һургуулидаа урижа, уулзалга үнгэргэдэг һэн. Тиин зохёохы бэлигтэй хүбүүн 1964 ондо Шагдар Байминовай, Николай Дамдиновай, Цогто Номтоевой урда шүлэгүүдээ уншажа магтуулхадаа, далижаһан юм.
Эдуард Дансаранович уһан сэрэгэй албанда ябахадаа, Номгон далайн флодой «Боевая вахта» гэжэ сониндо бэшэдэг байһан. Залуу ирагуу найрагша Валерий Мамурковтай һарын нэгэ үнгэргэгдэдэг хэшээлдэ ябажа, һайн һургуули гараа. Мүн гэрэл зураг буулгаха бэлигээ мүлиһэн юм. Эдэбхи үүсхэл ехэтэй хадаа, тус шадабарияа бүхы наһанайнгаа харгыда хэрэглэн ябаһаниинь бултанда мэдээжэ.
Эдуард Дансаранович Новосибирскын намай дээдэ һуралсал гараад, ажалда ябахадаа, сугтаа хүдэлһэн зоноо магтажа, нэрыень үргэн бэшэжэ ябаа. Mүн баһа дутуу дундануудые элирүүлһэн статьянуудые толилуулжа, ноёд сайдай сухалыень хүргэдэг һэн. Олохон зон гараа үгэхэеэ болёод, тойроод ябадаг бэлэй. Үнэн юумэн үнөөрөө - һүүлдэнь гэмтэй зон зэмээ ойлгоод, һайн нүхэд болоһон байдаг.
1992 ондо Эдуард Будаевай хурса гуурһан дороһоо түрүүшын репортаж мүндэлжэ, «Буряад үнэндэ» толилогдоо юм. “Тэрээнһээ хойшо “Үнэндөө” таһалгаряагүйгөөр бэшэжэл ябадаг хүмби, - гэжэ сэтгүүлшэн омогорхолтойгоор хөөрэдэг. - Редакторнууд Ревомир Гармаев, Цыдып Цырендоржиев, Ардан Ангархаев гээд лэ, аха үеын юрэнхы эрхилэгшэд болон Эрдэм Дагбаев, Валерий Хартаев, Баяр Балданов, мүнөө Баир Ширапов гээд лэ ехэтэ дэмжэдэгыень тэмдэглэе. “Жолоо үргэхэдэ – морин, бэшээшые үргэхэдэ – сэтгүүлшэн!” гэжэ зүб лэ юм!”
Эрхим эрхилэгшэ
Орон дотороо тохёолдоһон хүндэ хүшэр сагта Яруунынгаа сониной эрхилэгшын ажал даажа абаад, хоёр коллектив ниилүүлжэ, хүндэ сагые гаталжа шадаа. Эндэ урагшаа һанаатай зохёохы нүхэдэйнь үүргэ ехэ. Зарим аймагуудта редакцинууд зоноо үсөөлжэ, салингуудыень бага болгожо, хүндэ сагые гарасалдаһан байдаг. Яруунада иимэл асуудалнуудай гараашье һаань, олон арга хэрэглэжэ, мүнгэ зөөри олохын тулада ехэ ажал ябуулагдаа. Хоёр хэлэн дээрэ барлуулжа байдаг сониноо хүн зомнай таһалгаряагүй уншажал байгаа.
Ниигэмэй ажалые нэгэдхэгшэ
Эдуард Будаев олониитын ажалда хам оролсодог. Хори, Хэжэнгэ, Яруунада ба заха холын Захааминда үнгэргэгдэһэн олон тоото соёлой хэмжээ ябуулгануудта ажалшадаа жэншэдгүйгөөр хабаадуулаа. «Абай-Гэсэрэй» мянган жэлые, Буряадай сэтгүүлшэдэй түрүүшын хуралдааниие Яруунадаа үргэн дэлисэтэйгээр үнгэргэлгэдэ оруулһан хубитань сэгнэшэгүй.
Аймагай Зүблэлэй һунгамал байхадаа, аймагай Устав зохёолсожо, һүлдэ тэмдэгүүдые нютагайнгаа зураашадтай зохёоһон габьяатай.
Эгэтынгээ дасанда Зандан-Жуу бурханаа вертолёдоор залаһан зоноо Эдуард Дансаранович ударидаһан золтой, буянтай юм. Мүн Зандан-Жуу бурханайнгаа дуганиие барилга, рамнайлалгада хабаадаһан үүргэнь ехэ. Тиихэдэ нютагайнгаа түб Нарһатада ород сүмэ бодхоохо талаар горитой ажал ябуулаа. Иигэжэ арад түмэнэй эб хамта ажаһуухынь тула оролдодогынь бултанда мэдээжэ.
Наһатай хүнэй жаргал
Эдуард Дансаранович уласай олон тоото урилдаануудта оролсодог. 2017 ондо «Супер дедушка» урилдаанда эдэбхитэйгээр хабаадаа. «Хошон үгэ» урилдаанда II ба III һууринуудта гаража, «Буряад үнэн» Хэблэлэй байшангай дипломууд ба гарай бэлэгүүдтэ хүртөө. Эдэбхитэй бэшээшэ «Буряад үнэнэй” болон ВЛКСМ-эй ЦК-гай Хүндэлэлэй тэмдэгүүдээр, олон тоото Хүндэлэлэй грамотануудаар, ойн баярай медальнуудаар шагнагдаһан. Михаил Шолоховой 100 жэлдэ зорюулагдаһан медаль, Буряад Уласай, «Буряад үнэнэй» ойн баярай медальнууд олон даа. Буряад Уласай ба Ородой Холбоото Уласай габьяата хүдэлмэрилэгшын нэрэ зэргэ олгогдоһон. Мүн Ородой Cэтгүүлшэдэй холбооной «Габьяагай түлөө» тэмдэгээ эгээл үндэрөөр сэгнэдэг.
Эдуард Будаев - олон номой автор. Наһанайнгаа нүхэр Светлана Цыбиковна Дашиеватай суг хамта гурбан ном хэблүүлээ: «Дундаршагүй эрдэмэй булаг» (Иисэнгын һургуулиин түүхэ), ажалай ветерануудта зорюулагдаһан «Аласай холын ажалай сууряан», «Түрэл нютаг - инаг дуран» гэһэн уянгата шүлэгүүд ба үгүүлэлнүүдэй согсолбори.
Тиихэдэ Ивалгын дасанай шэрээтэ Даша-Нима Доржиевич эмшэ лама тухай «Субарган Зүгдэр Намжилма», уран зурааша Д.Б. Гыбанов тухай «Уран зураашын зохёохы зам», «Эхэ нютагайм домог – энэ наһанайм сэнэг» гэжэ рассказуудайнь суглуулбаринууд уншагшадта мэдээжэ болонхой. Гадна «Сэлгеэ талын дуун», «Нэрыень мүнхэрүүлэе» гэжэ номууд олон зоной һайшаалда хүртэнхэй.
Ерээдүйдөө анхарал
Уран үгын гайхамшаг шэдитэ хүсэндэ Эдуард Дансаранович этигэжэ, нютагайнгаа эдир бэлигтэйшүүлэй һүр һүлдыень үргэжэ, олониитэдэ мэдээжэ болгохо гэжэ ехэ оролдодог. Жэшээлэн хэлэхэдэ, Эгэтын-Адагай дунда һургуулида аймагай эдир сэтгүүлшэдэй фестиваль үнгэргэхэ ажал эрхилээ. Дүнгүүдээрнь зохёохы бэлигтэй үхибүүд «Океан» лагерьта амархаар урмашуулагдаа.
Эдуард Дансаранович хори гаран жэлдэ Яруунадаа уран зохёолшодой «Булаг» нэгэдэлые хүтэлбэрилнэ. Нэгэдэлэй зургаан гэшүүд Буряадай габьяата соёлой хүдэлмэрилэгшын үндэр нэрэ зэргэдэ хүртэнхэй, дүрбэниинь Ородой Сэтгүүлшэдэй холбооной гэшүүд болоно. Мүн хэдэн хүн Буряадай Уран зохёолшодой холбооной гэшүүд юм. Тэдэ мүнөө «Буряад үнэн», «Ярууна» сонинуудтаа, «Байгал», «Байкал» сэтгүүлнүүдтээ бэшэжэл байна. Эдуард Будаевай зохёохы ажалайнь саашанхи замай арюун байхын тула амжалта хүсэе!
Полина ЭРДЫНЕЕВА, Буряадай Уран зохёолшодой холбооной гэшүүн, багшын ажалай ветеран, «Буряадай түрүү хүнүүд - 2015» урилдаанай лауреат
Гэр бүлын архивһаа абтаһан гэрэл зураг