​Нооһоор урлажа һургана

Будаханда Гармаева аша зээнэртэеэ

Баргажан аймагай зунай нааданай үедэ нютагай уран гартанай бүтээлнүүдэй үзэсхэлэн дэлгэгдээ. Тэндэ ябахадаа, Хилганада бэрхэл зон ажаһуудаг юм байна гэжэ тобшолооб.

Элдэб янзын нооһон зүйлнүүдые дэлгэһэн Буда­ханда Гармаева олон хүнэй һонирхол татаа юм. Уран гартанай эжынь аймагтаа суутай оёдолшон байһан. Ти­ихэдээ угаа уһанда хаяхагүй гэдэгэй ёһоор, бэлиг шада­баринь басагандань дамжан ерээ гэлтэй.

- Хамтын ажахынуу­дай һалажа, хониной арһа нооһоной хаягдажа эхилхэдэ, сэдьхэлдэмни ехэ муу байдаг һэн. Нэгэтэ Улаан-Үдэ ошоод ябатараа, нооһоор нэхэжэ, шэрэжэ бүтээһэн зүйлнүүдэй үзэсхэлэн хараа хүм. Ехэ һонирхоод, удаань өөрөө урлажа эхилээб, - гэжэ Будаханда эгэшэ хөөрэнэ.

Тиин мүнөө үмсынгөө шэрүүн нооһото үүлтэрэй хониной нооһо сэбэрлэжэ, Троицк хотын үйлэдбэриин үнгэтэ нооһонтой холи­жо, хубсаһа, гутал, бээлэй, оймһо, хубсар бүтээдэг бо­лонхой.

- Хүнүүд ехэнхидээ шаа­хай, бээлэй, малгай захина. Яһала олые бүтээжэ найма­алааб. Нютагаархидни, илан­гаяа һургуулиин хүүгэд энэ урлалаар ехэ һонирходог. Ти­ихэдэнь сүлөөтэй байхадаа, долоон хоногой нэгэ удаа клуб соо тэдэниие суглуул­жа, нооһо сохижо, шэрэжэ, иимэ зүйлнүүдые бүтээжэ һурганаб, - гэжэ тэрэ хэлээ.

Мүнөө сагта меринос үүлтэрэй нарин нооһото хонин үгы болонхой шахуу. Шэрүүн нооһото хонин элбэг ааб даа. Уран гарта­най тэмдэглэһээр, нарин нооһотой хониной үүлтэр һэргээбэл, эдэ бүтээлнүүд бүри гоё болохол һааб даа.

Цырегма САМПИЛОВАГАЙ гэрэл зураг