​​Буряад уласай Хори аймагта үбшэнтэнэй аша туһада дэмбэрэлтэ хэрэг бүтэбэ

Хори аймагай түб больницада эрэмдэг бэетэй болон үндэр наһатай зондо лифт хүдэлдэг болобо. “Удинская новь” сониной мэдээсэһээр, Буряад Уласай Толгойлогшо Алексей Цыденовэй болон Элүүрые хамгаалгын яаманай аша туһаар энэ дэмбэрэлтэ хэрэг бүтэбэ.

Хориин больницын гурбан дабхар байшан 1967 ондо ашаглалгада тушаагдаһан юм. Тиихэдэ тусхай лифттэй байһан. Удангүй тэрэнь эбдэрээ. 1980-яад онуудай һүүл багаар лифт заһабарилха асуудал бодхоогдоо һэн. Харин гүрэн доторхи оршон байдал һэлгэгдэжэ, энэ ажал орхигдоо. Тиимэһээ хэрэггүй болоһон хуушан лифтын бүхы хэрэгсэлнүүд абтажа, шэб шэнэ лифт табигдаа.

Хори аймагай түб больницын ахамад врач Вячеслав Дондоковой хэлэһээр, булта баяртай байһанаа мэдүүлнэ.

- 630 килограмм дааха аргатай лифт соо хүндэ үбшэнтэниие хэбтүүлээд, түлхеэд ябаха тэргэ багташана. Тиимэһээ үбшэн зоноо дээшэ доошонь ябуулхадамнай, һураггүй хүнгэн болоо. Мүн тогоошодой шанаһан эдеэ хоол, үбшэнтэнэй унтари зөөхэдэмнай, туһатай болохо, - гэжэ ахамад врач хөөрэнэ.

Мүнөө үедэ тус больницые һэльбэн заһабарилха талаар түсэблэгдэһэн ажал ябуулагдана.