665
Буряад Уласай Толгойлогшын дэргэдэхи онсо аюултай байдал усадхаха, һэргылхэ, болон түймэрэй аюулгүй байдал сахиха талаар комиссиин зүблөөн июлиин 21-дэ үнгэргэгдөө. Тус зүблөө Буряад Уласай Засагай газарай Түрүүлэгшын аюулгүй байдалай талаар орлогшо Петр Мордовской хүтэлбэрилөө. Хэмжээ ябуулгада Загарай аймагай Эрхирик һууринай үерэй хойшолонгуудые усадхаха талаар хэлсэбэ.
Июлиин 20-до аадарлаһанай һүүлээр, Эрхиригэй ажаһуугшадай 30 гэр уһанда абтаа. Гэрэй шалаһаа 10-15 см дээшэ уһан гараа. Буряад Уласай Толгойлогшо ямар ушарһаа гэрнүүд уһанда абтааб гэжэ шалгалта ябуулжа, богони болзорто хойшолонгуудыень усадхаха гэжэ даалгаба. Алексей Цыденов тохёолдоһон байдал хинана. Уласай хүтэлбэрилэгшын даалгабаряар Эрхирик һуурин Загарай аймагай засаг даргын уялга дүүргэгшэ Анатолий Чмелев болон онсо байдалай талаар яаманай бүлэг ерэһэн байна. Ханааб татажа, уһа урдуулха гэжэ тусхай техникэ хэрэглэгдэнэ. Улаан-Үдын захиргаан туһа хүргэжэ, уһа һорожо абадаг машина эльгээһэн байна.
Суглаанай үедэ Петр Мордовской онсо байдал усадхаха аймагай комиссиин бүридэлдэ энэ һууринай эдэбхитэй ажаһуугшадые оруулха гэжэ даалгаба. Эдэнэр үерэй хойшолонгуудые усадхаха талаар ажал хинаха юм.
Буряад уластахи Роспотребнадзорой хүтэлбэриин даргын орлогшо Елена Кузьминагай хэлэһээр, инфекционно үбшэнүүд һүжэржэ болохо. Үбшэнэй гаража, дэлгэрхэгүйн тула хэмжээнүүд абтаа. Мүнөө ажаһуугшадай, тэрэ тоодо үхибүүдэй тоо гуримшуулагдажа, үбшэнүүдые һэргылһэн тарилга хэгдэхэ.
Тиихэдэ суглаанда дансануудые бүтээхэ, хубсаһа хунар суглуулха талаар ажал ябуулха гэжэ ниигэмэй хамгаалгын яаманда даалгагдаа. Уһанда абтаһан ажаһуугшадта туһа хүргэхэ туай мэдээсэл Буряад уласай ниигэмэй хамгаалгын яаманда 8(3012)44-17-05 гэһэн утаһаар абажа болоно.
Буряад Уласай Засагай газарай мэдээсэлэй албанай гэрэл зураг
