995
Аймагууд хоорондын «Зүүн зүг» гэһэн Залуушуулай уулзалга Хориин хатад гэһэн хүшөөгэй дэргэдэ үнгэрбэ. Хори, Хэжэнгэ, Ярууна хүршэ аймагуудай уг нэгэтэ залуушуул зунай зулгыда ехэ удхатай хэмжээ ябуулгада урматайгаар хабаадаа.
Эндэл улзалгада ерэгшэдые Хори аймагай засаг даргын орлогшо Элеонора Ламханова, Залуушуулай таһагые даагша Татьяна Арефьева хоёр халуунаар угтан амаршалаа.
Дуу хатарай «Үдэ» бүлгэм үндэһэн хатар наадаараа хэнэйшье мартахагүйгөөр найраа эхилжэ, бултаниие ёохорой нааданда хабаадуулаа. Буряадай Тамирай болон залуушуулай талаар яаманай орлогшо сайд Татьяна Парпаева үдэр дүүрэн залуушуулаар харилсаа. Тэрэ олон зоной урда яажа бэеэ абажа ябахаб, өөртөө анхарал яажа хандуулхаб, хайшан гэжэ аша үрэтэйгөөр харилсахаб гэжэ хөөрэлдөө. Яаманай мэргэжэлтэн Чингис Болотов мүнөө үедэ сүлжээ холбоониие ямар аргаар дүүрэн хэрэглэхэб гэжэ тобшо заабаринуудые үгөө. Удаань булта лаптаа, волейбол наадануудые үнгэргөө.
Үдэшэлэн тээшэ мяха яажа амтатайгаар шорлохоб гэжэ мүрысөө. Тиихэдээ ганса амта шэмтэнь сэгнэгдэхэһээ гадна, тэрээгээрээ хэниие, яажа хүндэлдэг байһаниинь сэгнэгдээ. Хэжэнгээрхин энэ талаар онсо илгараа. Яруунаархин элдэб үнгөөр загаһа сонгооходоо бэрхэ байһанаа харуулаа. Хориин 2-дохи һургуулиин залуу багшанар эгээл амтатайгаар сонгооно гэжэ элирээ. Шадалаа харуулһан залуушуул Чингис Болотовой «Бидэбди» гэһэн нааданда тэмсээ.
Үдэшын наадануудые Хори аймагай засаг дарга Юрий Ширабдоржиев нээжэ, илагшадта шангуудые барюулаа. Брейк-данс хатараар Эдуард Пунцуков согтой сортоотой хатараараа бултаниие гайхуулаа. Алина Намсараева дуунуудаараа бултаниие баярлуулаа. Оперын театрай ирагуу хоолойтой Ольга Татаурова дуунуудаа залуушуулда зорюулаа. «Байгалай эрье» КВН-эй хүбүүд шог ёгто хөөрөөнүүдээрээ хүхеэгээ. Тиигээд лэ хүгжэм дуута хатарта булта дүхэриглөө.
Үдын үргэн эрьедэ залуушуул үни удаан сог залитайгаар наадан хүхижэ, орон нютагаа баясуулан хүндэлжэ, дахин иигэжэл эбтэйгээр уулзахаяа хэлсээ.
vk.com/fmhorinsk сайтһаа гэрэл зураг абтаба
Автор: Сэнгэ РИНЧИНОВ
