​​Буряад уласай Эрхирэгтэ болоһон үер усадхалгын хэмжээнүүд удангүй абтаа

Июлиин 20-до аадар бороон һуулга һабаар адхажа, Эрхирэгэй гудамжанууд, айлнуудай гэр байранууд үертэ ороо. МЧС-эй мэдээсэһээр, 30-аад гэр байра хохидоо. Улаан-Үдэһөө тусхай хүндэ техникэ, шэнгэн зүйл һородог тусхай машина дары түргэн эльгээгдэжэ, үерэй хойшолонгуудые усадхаха ажал эхилээ.

Алексей Цыденов аюулда орогшодтой уулзаа

Буряад Уласай Толгойлогшо Алексей Цыденов үертэ абтаһан зонтой июлиин 21-дэ уулзаа. Уласай Засагай яамануудай, Загарай аймагай захиргаанай мэргэжэлтэд, нютагай түлөөлэгшэд Толгойлогшотой хамта үертэ абтаһан гудамжануудаар ябажа, заһабарилгын ямар ажалнууд хэгдэхэб гэжэ хараалаа.

- Энэ бэеэрээ харгы малтажа, сорго шэнээр табиха. Мүн айлнуудай газаа хаагуур шабар ехээр шэдэгдээб, тэрээниие тусхай техникээр түлхюулжэ сэбэрлэхэ хэрэгтэй. Подвал, подполинуудһаа уһа һоруулжа гаргаха баһал шухала. Июлиин 23 болотор эдэ ажалнуудые бүтээхэ, - гэжэ Алексей Цыденов захираа.

Нютагай бэрхэшээлнүүд

Эрхирэгэй ажаһуугшадтай уулзалга иигээд дүүрээгүй. Уласай Толгойлогшо нютагай бусад хүндүүлхэй асуудалнуудые хараалаад, иимэ шиидхэбэринүүдые абаа:

- Харгы һайнаар хэгдээ юм байна. Тиибэшье зайн гал үгы, ябаган зоной гараха газарнууд тэмдэглэгдээгүй. Авто-хүлэгүүд дан түргэн харайлгалдана. Тиимэһээ гэрэлтүүлхэ, ябагаар гараха газарнуудые тодорхойлон тэмдэглэхэ, харгын тэмдэгүүдые түргэн табиха хэрэгтэй;

- Зайгуул нохойнууд даншье һаа олошороо. Тэдэнэр үхэр мал намнажа, хазажа шархатуулна гэһэн гомдолнууд олошороо. Иигэһээр үхибүүдтэшье добтолжо болохо.Энэ асуудалаар тусхай хөөрэлдөөн болохо.

Алас Дурна хизаарые хүгжөөлгын түсэлөөр шэнэ үеын тамирай талмай Эрхирэгтэ бэлдэхыень Алексей Цыденов Барилгын яаманда заабарилба. Һаяын сагта эндэ тааруу газар шэлэжэ, гаргашыень хараалха даабари үгэбэ.

Һэргылэмжын ажал хэгдэхэ

Ганса хойшолонгуудые усадхаха бэшэ, харин юундэ иимэ ушар тохёолдооб гэжэ элирүүлхэ хэрэгтэй гээд, Засагай газарай Түрүүлэгшын орлогшо Пётр Мордовскойн хүтэлбэри доро болоһон суглаан дээрэ хэлэгдээ. Тиигээд ганса энэ нютагта бэшэ, харин бүхы тээ һэргылэмжын ажал эршэдүүлхэ гэжэ хэлсэгдээ. Огторгойтой хэлсээтэй бэшэ хадаа яахабши, өөһэдтөөл найдаха хэрэгтэй.

Пётр Мордовскойн хэлэһээр, нютагай эдэбхитэдые иимэ ажалнуудта хабаадуулха шухала. Тиихэдээ баһал хойшолонгуудые усадхаха ажал хэрэгүүдтэ өөһэдөө хабаадажа, хохидогшодто хүргэгдэхэ туһаламжые хүсэд дүүрэнээр үзүүлхэ гэжэ тэмдэглээ.

Үерэй удаа халдабарита үбшэнүүд дэлгэрдэг гэжэ мэдээжэ. Тиимэһээ үхибүүдһээ эхилээд, бусад зонтой һэргылэмжын хүдэлмэри Роспотребнадзорой мэргэжэлтэд нютагай захиргаантай хамта хэхэ гэжэ хүтэлбэрилэгшын орлогшо Елена Кузьмина мэдээсээ.

Хохидогшодто саарһа дансаяа бэлдэхэһээнь эхилээд, али болохо туһаламжа үзүүлхэ хэрэг Ниигэмэй яаманда даалгагдаа. Энэ талаар 8(3012) 44-17-05 утаһаар хонходогты.

Буряад Уласай Засагай газарай мэдээсэлэй албанай гэрэл зураг