​Буряад уласта үбһэ хуряалгада бэлэдхэл эхилээ

Хотогор һайхан Хоридоо мэдээжэ олзын хэрэг эрхилэгшэ, бэрхэ малшан Александр Шурыгинай ажахын үбһэшэдэй бригада үбһөө абахаяа оробо.

35 жэлэй саана хубиин ажахы нээһэн тула Александр Семёнович баян дүй дүршэлтэй болонхой. Ногоо сабшаха, һэлихэ, тармаха, бухаллаха, һүрилхэ техникэеэ түгэс бэлдэнхэй.

-Ажалшаднай булта дүршэл ехэтэй юм. МТЗ түхэлэй гурбан, үшөө нэгэ Т-40 тракторнуудые бүхы оньһон техникэтэйнь бэлдээбди. Илангаяа эрхим бэрхэ Пётр Баженовые тэмдэглэн магтанаб. Бүхы техникэеэ тэрэ жэншэдгүй мэдэдэг, өөрөө заһабарилдаг. Тэрэнэй жэшээгээр залуушуулнай иигэжэ мэргэжэбэл ехэл һайн бэлэй, - гэжэ Александр Семёнович ерээдүй халаан тухайгаа һанаата болоно.

Урдань ород арадай литээр Петров үдэртэ үбһэндөө гарадаг байһан. Энэ үдэр июлиин 12-то тудадаг. Тиигээд Ильин үдэртэ – буряадууд Эльгэндеэн гэдэг (августын 2-то) үбһэеэ хуряажа дүүргэдэг һэн. Тиигээд таряагаа хуряаха. Теэд мүнөө сагта уларил хубилаа. Зүблэлтэ сагай үедэ хэн арадай литэ харагша һэм, гэбэшье буряадаймнай колхоз, совхозуудые июлиин тэнгээр үбһэндөө гарагты гэжэ албададаг бэлэй. “Харьялан урдаа Хёлгомнай” роман соогоо Барадий Мунгонов урдандаа буряадууд ногооной үрэһөө хаяхые хүлеэдэг байһан гэжэ онсолһон байдаг.

Манай эндэхи уларилаар дан эртэ сабшалгадаа ородоггүй. Тиимэһээ нютагай зон (ганса буряадууд бэшэ, эндэ нютагжаһан ородшье зон) нютагай уларилтай ажалаа тааруулдаг болонхой. Сабшалгаяа эхилхэдээ, үдхэн ногоотой һайса үтэгжүүлэгдэһэн бууса газарнуудһаан эхилнэ.

Энэ һарада бороо хура элбэгээр орожо, Хориин хотогор дайдаар хаа-яагүй ургаса һайн. Илангаяа Шүбэгүүндэ ногоон элбэгээр ургажа, энэ доронь бушуу сабша гэхээр болошоо. Энэ бригадын табан ажалшад 78 гектар сабшаланһаа мянган центнер һайн шанартай үбһэ бэлдэхэбди гэжэ найдана.

Баир Борбоевой гэрэл зураг