​​Буряад Уласай Яруунын малшад зуһаландаа - зүлгэтэйгөөр

Урдандаа Яруунын адуушад, малшад бүхы аймагһаа тунга ногоотой Түрхэл гэжэ бага сага хужартай, түхэреэн нууртай нугада зуһадаг байһан. Ха­рин мүнөө “Үльдэргэ” СПК-гай малшад болон хэдэн үмсөөрхин лэ зуһахаяа буудаг.

Тэндэ хүрэхэшье гээ­шэмнай мүнөө сагай тех­никээр хүндэхэн хэрэг. Ур­дандаа харгы замаа эмдэжэ һандараангүй, аалин аятай­хан мори тэргээрээ ябадаг байгаа ааб даа. Харин мүнөө гэнжэтэ трактор, вездеход, үшөө газарай хүрьһэ малта­ад гарадаг ашаанай хүндэ машина байха – тэдэнэй гаргаһанай колея соогуур гараха гээшэмнай... бү хэ­лэе! Хажуугаарнь могойтон орёолдоһон хэдэн горхо га­талхаш!

Түрхэл хүрэхэ замай тэндэ нютагай зон субарга бариһан юм. Энэ субарга­даа мүргэжэ, сэржэм дээ­жэеэ үргэхэдөө, нүүдэлшэд һанаа сэдьхэлээ тэниилгэжэ, Түрхэлэймнай орон хангай һайнаар угтахань гэжэ сэдь­хээд, замаа үргэлжэлүүлдэг.

Энэ түхэреэн ехэ нугада мүнөө сагта Буряадтамнай эгээл олон гэжэ тоологдодог мянган адуун болон сага­ан толгойто казах үүлтэрэй юһэн гүүртэ зуһана. Зуһаланай байра бүхэндэ нара­най элшэ тодожо абана. Мүн баһа сэнхир газаар хүдэлхэ плитанууд табяатай.

Эндэ һайнаар онсолон тэмдэглэхэдэ, “Үльдэргэ” ажахын түрүүлэгшэ Булад Будажанаев энэ нугаяа та­бан хургандал мэдэдэг юм. Малшадай хэлэһээр, энэ хүтэлбэрилэгшэ малдаа бэр­хэ, адуугаа хаагуур манахаб, эбэртэ малаа хаагуур бэлшэ­эхэб гэжэ малшадтаа хэлэжэ һуухыень шагнахада урматай юм.

Намжил МАРДВАЕВАЙ гэрэл зураг