​​Буряад уласта газ хэзээ бии болохоб?

Удангүй котельнинүүд газаар түлигдэхэ

Иимэ асуудал үнинэй табигдана. Теэд Буря­ад Уласые газаар хангалга тухай шиидхэбэри абтанагүй.

Санкт-Петербург хото­до болоһон экономическа ехэ хуралдаанда Буряадай хойто аймагуудаар газ аса­рагдахань гэһэн мэдээсэлые хүн зомнай баяртайгаар хүлеэн абаа. Ород гүрэнэй Юрэнхылэгшын дэргэдэ Буряад Уласай бүрин эр­хэтэ түлөөлэлгын эмхиие хүтэлбэрилэгшэ Антон Виноградовай хэлэһээр, газ дамжуулха тухай хэлсээн ба­талагдаа.

- Буряад Улас ООО “Газ­пром СПГ технологи” гэһэн бүлгэмтэй хэлсээ. Мүнөө дээрэ ганса хашагдаһан газ тухай хөөрэлдөөн болоно. Юундэб гэхэдэ, манай уласай дэбисхэр дээгүүр газай сор­го татагдаагүй. Түрүүшын алхам хээбди. Энэ хэлсээгээ бэелүүлгэ түргэдүүлхэ хэ­рэгтэй, - гэжэ Антон Виноградов мэдүүлнэ.

Буряад оронһоо холо бэшэ оршодог Ковыктинска газова уурхайһаа хашамал газ хойто аймагуудта дам­жуулагдахаар хараалагдан­хай. Хойто-Байгал болон Муя аймагуудай гурбан ко­тельни газаар түлигдэдэг болохонь. Ерэхэ жэлдэ үшөө хэдэн котельнинүүд газаар дулаасуулагдажа эхилхээр түсэблэгдэнхэй. Тиимэһээ хашамал газ жэлһээ жэлдэ Буряадта ехээр асарагдадаг болохо юм.

2019 оной апрель һарын һүүл багаар Захаамин айма­гаар ажалай хэрэгээр яба­хадаа, Буряад Уласай Тол­гойлогшо Закаменск хотодо газаар түлигдэдэг котельни бариха һанаатай байһанаа мэдүүлээ бэлэй.

- Мүнөө үедэ эндэхи ко­тельни мазутаар түлигдэнэ. Бүхы Буряад соо иимэ котельни үгы бшуу. Энэ аргагүй үнэтэй юм. Энээнһээ боложо, Закаменск хотын ажаһуугшад тон ехэ мүнгэ дулаасуулгын түлөө гарга­шална. Газай котельни хадаа тиимэшье ехэ сэнтэй бэшэ, мүн дулаашье ехээр үгэдэг, - гэжэ Алексей Цыденов тии­хэдэ арад зониие найдуулаа һэн.

Бусад аймагуудта шу­луун нүүрһээр түлигдэдэг котельнинүүдые баһа газта оруулха түсэбүүд табигдана. Тиимэһээ Буряад орон газ ехээр хэрэглэдэг можо хиза­арнуудай тоодо орохо арга­тай. Иигэһээр засаг бариг­шадай урда Буряадта газай сорго татаха тухай асуудал элеэр табигдахань ха.

Борис БАЛДАНОВАЙ гэрэл зураг