​Ажалша бүлэ

Үльдэргын үнэр баян нэгэ гэр бүлэтэй танилсуулхамни. Дамби Залхаевич, Светлана Борисовна Цыдыповтэн июлиин 28-да айл бүлэ болоhоор 50 жэлэйнгээ алтан ой тэмдэглэхэеэ байна.

Ажахын хүгжэлтэдэ хубитаяа оруулаа

Урихан хабарай эрьен ерэжэ, тала дайдын нойрhоо hэрижэ, ургын hалбаржа байха үеэр Залхай Дамшаевич Цыдыпов Дарима Доржиевна Галсанова хоёрой зургаан үхибүүдэй гурбадахинь боложо, 1946 оной майн 13-да Дамби Залхаевич түрэһэн. Тиигэжэ хоёр эгэшэнэрээ дахан, гурбан дүүнэрээ үргэлсэн, өөдөө болоһон аабза.

Дамби Залхаевич багжагар хүдэр бэетэй, hүбэлгэн ухаатай, ажал хэхэ эрмэлзэлтэй, ирагуу хоолойтой байһан.

Сагай хүрдэ эрьелдэһээр, 55 жэл табан үдэр мэтээр үнгэрөө. Эдыхэн хугасаада Дамби Залхаевич «Үльдэргэ» СПК-гай ахамад зоотехнигээр, түрүүлэгшын орлогшоор ажаллахадаа, адуу малайнгаа үүлтэр hайжаруулхын, тоо толгойень олошоруулхын, олзо оршыень дээшэлүүлхын түлөө ябадаг hэн.

МТФ-гэй даагша байхадаа, ажалдаа ехэ наринаар хандадаг байгаа. Һүүлдэнь эбэртэ бодо малай цехэй даргаар ажаллажа, түрэл ажахыдаа ехэхэн хубитаяа оруулhан намтартай.

Олон hалбаритай хүдөө ажахые хүтэлбэрилхэ, ударидаха гээшэ айхабтар харюусалгатай, орёо хүшэр, эрилтэ ехэтэй хэрэг ха юм. Түхэреэн жэлдээ ажал хэрэгүүд эндэ дүүрээ гэжэ байдаггүй...

Үхибүүдые һургаха үндэр үүргэтэй

Шэтэ можын Хоолошоной hууринда Гармаев Бизья Ламахандуевич ба Чимитцо Раднаевна хоёрой жаргалтай гэр бүлын ууган үхибүүн боложо, 1947 оной июниин 19-дэ Мэдэгма Борисовна түрөө.

Дороо дахуулха, дүнгэжэ ябаха дүрбэн дүүнэртэй, энэрхы hайхан сэдьхэлтэй, түбшэн даруу зантай, ажалда бэрхэ басагаяа эжы абань эрдэм ном олгуулаа.

Улаан-Үдын багшанарай училищи дүүргээд, Светлана Борисовна эдир наhандаа Мужыхын hургуулида хүдэлжэ эхилээ.

Нюдэндөө галтайхан, нюуртаа согтойхон зулгы зохидхон басаган 1969 ондо наhанайнгаа гансатай золгожо, алтан дэлхэйн жама ёhоор айл болохо гээшые алгасаагүй. Залхайн Дамби алдартай задарюун улаан хүбүүндэ хадамда гаража, Обоото Баабайнгаа үбэртэ угтажа абадаг Үльдэргэ нютаг хүргүүлээ бэлэй. Үргэмжэтэй энэ нютагта үнэр баян айл болон түбхинөө.

Светлана Борисовна 40 жэлэй туршада Үльдэргын дунда hургуулида багшалжа эхилhээр, долоон үе үхибүүдые ахамад классууд руу дамжуулhан байна.

Арюун hайхан шарайтай, сэбэр сагаан сэдьхэлтэй, оюун ухаан бодолтой, эльгэ нимгэнтэй, зулгы зохид зантай, зондоо хүндэтэй багша юм. Һурагшадыень анхаралтайгаар адаглахада, бэе бэедээ дулаан хандасатайнууд, нэгэ бүлын хүүгэд мэтэ эбтэйнүүд, журамтайнууд гэжэ нютагаархидынь хэлэдэг.

Эхэ эсэгын үргэлжэлэл - үхибүүд

Цыдыповтэнэй гэр бүлэ 5 үри хүүгэдые өөдэнь болгожо, ажабайдалай үргэн харгыда табинхай.

Ехэ басаган Юлинь эжынгээ харгы шэлэжэ, эхин ангиин багшын мэргэжэлтэй, Бэлигтэ нүхэрынь – терапевт. Аюр хүбүүниинь абадаал адли эмшэн болохые шиидээд, ординатурада һуралсалаа үргэлжэлүүлжэ байна.

Хоёрдохи басаган Алёнань баһал багша мэргэжэлтэй. Гурбан үхибүүдэйнь тон ехэнь - Баяр. Эрхүүгэй политехническэ дээдэ hургуулида hурана, Сономынь 9-дэхи ангиин hурагша болобо. Багань - табатайхан Суржана.

Гурбадахи Доржо хүбүүниинь жолоошон юм. Түмэр тэргэ заhаха, модооршье элдэб юумэ дархалха аргатай, Вера нүхэрынь буряад хэлэнэй багша юм. Үгэ ба хүгжэм зохёодог буряад эстрадын

дуушан нэрэтэй. Рита басаганиинь Забайкалиин хизаарай медицинскэ колледжын 3 курсын оюутан, Номинань 9-дэхи классай hурагша, Юмжанань 5-дахи классай hурагша, Очирмань 1- дэхи класста оробо.

Дүрбэдэхи хүбүүн Баярынь hуралсалдаа бэрхэ, ажалшашье байһан. Дээдэ һургуулида һуража ябаад, залуугаар энэ дэлхэйһээ хахасаа.

Бага басаган Зинань баһал багша мэргэжэлтэй. Петя нүхэрынь инженер мэргэжэлтэй, 4 хүүгэдтэй. Владигынь 9-дэхи классай hурагша, шатар наадаха дуратай. Арьяна 4-дэхи классай hурагша, Буряадай гүрэнэй «Байгал» театрай дэргэдэхи «Уян бэлиг» гэһэн хүүгэдэй хатарай ансамбльда хатардаг. Айнур 6 наhатай, Инна 3-тай.

Аша зээнэрээ тойруулан

Дамби Залхаевич Светлана Борисовна хоёр мүнөө аша зээнэрээ тойрууланхай түни түбшэн ажаhууна. Үхибүүдынь ерэн ошон байдаг.

Наhанайнгаа амаралтада гараад, миин hуудаггүй - ашанартаяа хамта хартаабхаяа хаядаг, үбhэеэ хуряадаг, хубиингаа үхэр мал харадаг ажалтай. Зүбөөр ажаһууһан зоной байдал иимэл байдаг аабза.