​Буряад Уласай һүнэй үйлэдбэри үри шэриһээнь яажа гарахаб?

Буряад оронойнгоо үрэжэлтэ талаһаа хүн зонойнгоо ундалха һүн сагаа эдеэ элбэг дэлбэгээр абахал байгаалди даа. Теэд...

Һүүлэй мэдээгээр харахада, һү болон сагаан эдеэнэй зүйлнүүдые үйлэдбэрилдэг гол ажахымнай болохо “Молоко Бурятии” эмхи худалдажа абаһан һүнэйнгөө түлөө Буряадайнгаа ажахынуудта 14 сая 700 мянган түхэриг үритэшөөд байна.

Үшөө тиихэдэ үнгэрһэн жэлдэ нэгэ литр һү 22 түхэриг 40 мүнгөөр абажа байһанаа, энэ тааруухан сэнгынь үшөө доошонь унагаажа, 15 түхэригтэнь хүргэжэрхёо!

-Буряадай Засагай газар үнгэрһэн жэлнүүдтэ “Молоко Бурятии” эмхидэ туһалха гэжэ туһалаа. Теэд энэ эмхи үри шэрэһээнь гаража шаданагүй. Мүнөө сагта 15 түхэриг гээшэмнай сэн бэшэ. Ондоогоор ажалаа ябуулжа шадахагүй болболнь – энэ эмхиие ямаршье туһаламжаһаа болюулха, - гэжэ Буряад Уласай Толгойлогшо Алексей Цыденов шангаар мэдүүлээ.

Харин “Кабанский”, “Бэшүүрэй тоһоной завод”, Сэлэнгын “Берилл” болон “Ойморой хурууд буйлуулдаг” эмхинүүд гүрэнэй туһаламжаар худалдажа абаһан һүнэй түлөө саг соогоо түлэнэ гэжэ Хүдөө ажахын яаманай сайдай уялгые дүүргэгшэ Юлия Дагданова мэдүүлээ.