1269
Хойто Солонгосой түлөөлэгшэд Буряадта айлшалхадаа, нэн түрүүн Зүүн зүгэй эмнэлгын түбтэ хүрэжэ, эм домтой сай болон эм домтой ургамалнуудаар буйлуулагдаһан ундануудые амталжа, шанарыень сэгнээ.
Зүүн зүгэй эмнэлгын түбтэ 50 янзын эм домто бодосууд бэлдэгдэнэ. Эдэ зүйлнүүд бэеын доторой үбшэнүүдые һэргылгэдэ, эмнэлгэдэ үргэнөөр хэрэглэгдэнэ. Илангаяа “Адис” сай олондо һайшаагдаа.
Буряадай эрдэмтэдэй шэнжэлэлэлгэнүүдээр найруулагдаһан эм дэмтой зүйлнүүдые саг сагтань хэм соохононь заагдаһан ёһоор бариха юм гэжэ тайлбарилан заабарилжа үгөө.
Хойто Солонгосой түлөөлэгшэд ехэтэ һонирхожо:
-Энээхэн соохиие хэды хоногто хүртэхэ юм?- гэжэ байжа олон зүйлнүүдые һураа.
-20 үдэр хүртэхэт. Таарабал, үрэ дүнгынь тэрэ дороо элирхэ, - гэжэ манайхин ойлгуулаа.
Зүүн зүгэй эмнэлгын түбтэ найруулагдадаг эмэй зүйлнүүд эндэл, энэл нютагта ургадаг эмэй зүйлһээ буйлуулагдадаг. Харин Солонгосто ехэнхидээ хүн горхоодойн үндэһөөр (женшень гэдэг) эмэй зүйлнүүдые найруулдаг.
-Юрэнхыдөө, 30 жэлэй хугасаада манай эм домууд шэнар шэнжэеэ баталжа шадаа , - гэжэ Зүүн зүгэй эмнэлгын түбэй эмэй сангай газарые даагша Татьяна Туртуева хөөрэжэ үгөө.
Иимэ туһатай һайн мэдээсэл абаһан солонгос айлшад “Амта” фабрикада хүрөө. Буряадай амтатайхан хоол тэдэндэ ехэтэ һайшаагдаа. Тиимэһээ талхаяа анхан яажа зууранаб гэжэ ехэтэ һонирхоо. Энэл арга хүсэд дүүрэнээр ойлгожо, хэрэглэжэ шадабал, ямаршье шанарай амтатай зүйл бүтээжэ шадахабди гэжэ айлшад мэдүүлээ.
-Һарадаа 360 тонно амтата зүйл үйлэдбэрилнэбди. Манай үйлэдбэрилһэн зүйлнүүдые Монгол, Хитад гүрэнүүд ехээр худалдан абадаг. Мэнэ һая Урда Солонгостой хэлсээ баталаабди. Харин хойто Солонгосой түлөөлэгшэд ехэ наринаар шэнжэлэн хаража, һонирхоһон зүйлнүүдээ бэшэжэ абаба, - гэжэ “Амта” фабрикын орлогшо захирал Татьяна Покацкая хөөрэбэ.
-Хоёр гүрэнэй хоорондо харилсаа тогтоохо, худалдаа наймаа үргэдхэхэ гээшэ холын хараатай гүрэн түрэнүүдэй ехэ хэрэг. Хоёр гүрэнүүдэймнай хоорнондо сэхэ наймаа ябуулха хэрэг үшөөл хүндэхэн. Энэ ажал эбэй хүсөөр ябуулагдажа, сэхэ зам нээгдэхэ гэжэ найдагдана. Хойто Солонгос орон ехэ ниисэгүй гэбэшье, бууһан айлшад ехэ хёрхо, юумэ бүхэнөөр һонирхоно, ажаглан хадууна гэжэ анхараабди. тиимэһээ Ородой Холбоото Улас Хойто Солонгос Улас хоёр гүрэнүүдэй хоорондохи харилсаанууд үргэгдэхөөр хараалагдана, - гэжэ Ородой Холбоото Уласай түлөөлэгшэ Вадим Салтыковский мэдүүлээ.
Анна Огороднигой гэрэл зураг
Автор: Сэнгэ РИНЧИНОВ
