​​Буряад уласта жэмэсүүд ямар сэнтэйб?

Шэрүүн хүйтэн үбэлэй сагта үбшэ хабшанда диилдэнгүй байхын тула, өөрынгөө бэе зундаа hайнаар hорихо, бэлдэхэ ёhотой гэжэ Сибириин хүн бүхэн мэдэнэ: наранай игаажа, уhанда шунгажа тэнхээ тамир абана, огородой ногоон эдеэн болон ойн баялигай жэмэс ургамал түүжэ витаминаар бэеэ хангана.

Буряад ороной дэбисхэр дээрэ ургадаг олон янзын жэмэс «Центральный» гэhэн худалдаа наймаанай дэлгүүр дээрэ булта тооной табяатай байба. Алирhан, нохойн хоншоор, шасаргана, зэдэгэнэ болон бусадшье жэмэсүүд дэлгүүртэ табигданхай. Жэмэс бүхэн өөрын сэнтэй. Эгээ үнэтэйнь Эрхүүгэй зэдэгэнэ, 1 кг 800 түхэригтэ байба.

- Энэ жэмэс холын харгыда ябажа ерээшьеhаа, тэрэл зандаа: томо улаан,. Өөрын нютагай жэмэс бүри hайн гэжэ хүнүүд мэдэдэг болонхой. Байгал шадарай зэдэгэнэ баhал hайн наймаанда гарана. Варени шанаха гэбэл, энэ жэмэс эгээ мүнөөл абаха хэрэгтэй. Нэгэ хэды болоод, зэдэгэнэ түүхэ саг үнгэржэ, сэн бүри үнэтэй болохо. Дэлгүүртэ байhан жэмэс бүхэн шалгалта гарадаг. Худалдан абагшад наймаашадhаа шалгалтын дансануудые хараха аргатай, - гэжэ наймаашан Наталья хөөрэнэ.

Улаан-Үдэдэ байдаг «Сибиряк» гэhэн саадта суглуулжа, хүдөө нютагуудһаа, Эрхүү можоһоо жэмэс асаржа худалдана. Үхэр нюдэн -150 түхэриг, зэдэгэнэ – 200 түхэриг, нэрһэн – 180 түхэриг, бусадшье жэмэс 100-һаа 200 түхэриг хүрэтэр сэнтэй. Жэмэсээ саахартай худхажа, 500, 600 түхэригөөр худалдана. 

Долгорма Бадмаевагай гэрэл зурагууд