​Һанаһанаа хэлээд

Түүхэдэ ороһон хашалган хамалганай һүрөөтэ үе сагтай жэшэхэдэ, мүнөө бидэ амархан ажаһуунабди. Һанаһанаа хэлээд, хаа-хаагуур “шааяад”, үнгэржэ ерэхэдээ, социальна холбоон соо олон тоото нүхэдтэй болоод, тэдэнтэеэ энэ-тэрэеэ зүбшэлсөөд байха арга боломжотойбди (лайк). Тиигэһэнэймнай түлөө ямаршье хэһээлтэ хүлеэнэгүй ха юм (смайлик). Үнгэрһэн долоон хоногто минии нүхэдэй һанааень эзэлһэн үйлэ ябадалнуудтай танилсуулһуу. Тэрэнээ саггүй фейсбук хуудаһандаа бэшэжэ байна ха юм.

Һунгалтада оролсоно

Буурал Буряадтамнай һунгалтын урда тээхи хүдэлөөн хаа-хаагуур эхилэнхэй. Зарим тээ абяа шэмээгүйшэг шэнги аад, дүтөөр хараалбал, элдэб һонин мэдээ малтахаар. Жэшээлхэдэ, Мухар-Шэбэрэй райсоведэй бүридэлдэ һунгагдаха хүсэлтэйшүүл олон боложо байна. Буряадай тамиршадтай дүтын холбоотой улас түрын ажал ябуулагша Баир Дашибальжиров үнгэрһэн хабарһаа хойшо түрэл аймаг руугаа харгылдаг болонхой. Тэндэ болоһон бүхы хэмжээ ябуулгануудта эдэбхитэйгээр оролсон, бэеэ мэдүүлнэ. Сохом, холые хараалһан түсэб урдаа баринхай гэжэ ойлгоноб. Магад, аймагай Зүблэлые толгойлхо аалам. Тиигэһэйл гэжэ найдаха байнаб!

Гадна энэ һунгалтада түрүүшынгээ туршалга гарахаяа байһанаа минии нүхэр Дулма Содномова “Фейсбук” хуудаһандаа иигэжэ мэдүүлбэ: «Мухар-Шэбэрэй һунгамалнуудай Зүблэлэй бүридэлдэ орохын тулада һунгалтада хабаадахаяа дансануудаа тушаагааб. 10 үдэр болоод, кандидадай үнэмшэлгэ барюулха юм. Тиигэхынгээ урда тээ дансануудыемни шалгаха. Гэбэшье минии түлөө гараа табиһан суулгаархиндаа халуун баяраа хүргэнэб. Суулга, Гаше, Зандин, Хүһөөтэ һууринуудые бүридэлдөө оруулдаг тойрог дотороо ажал хэхэ үлөөд байна” . Бусад хабаадагшадай хажууда Дулма һая бултайһан “дальбарааханшье” һаа, һайхан һанаагаараа нютагтаа туһатай байхаяа зүдхэһэниинь юунһээшье сэнтэй. Олониитын хэрэгтэ хашалгүй оролсожо ябадаг, урагшаа һанаатай нүхэртөө амжалта хүсэнэб.

Улаан-Үдын Захиргааниие ударидахын тулада һунгалтада оролсогшодые урдахи дугаартаа хараалаабди. Харин хотын һунгамалнуудай Зүблэл сентябриин 8-да шэнээр бүридхэгдэхэ гээд дуулгангүй үлэшөөбди. Зүблэлэй гэшүүн болохоёо хүсэгшэд мүн лэ олон. Харин кандидадай үнэмшэлгэ гартаа баряад, хэжэ эхилһэн ажаябуулгаяа дуулгагшад арайл үсөөн байна. Тэдэнэй тоодо – Норжима Цыбикова ороно. «Фейсбук» хуудаһандаа тойрог доторхи бэрхэшээлнүүдые яагаад шиидхэхэ тухай харасаяа олониитэдэ үргэлжэ дамжуулжа байна. Улаан-Үдын һунгалтын 12-дохи тойрог болохо Үдэ голой зүүн эрьедэ оршодог Солдатский, Исток, Аэропорт, Сокол тосхонуудай ажаһуугшад бэшэһэнииень уншаад, зүбөөр һунгаха бэзэ!

Бусадһаа булюу илгараабди

Бэшүүрэй Шэбэртэдэ үнгэрһэн Фермерэй үдэрые Намжил Мардваев социальна холбоон соо иигэжэ шүүмжэлбэ: “Бүхэроссиин бусад регионуудһаа балет хатаржа онсо илгарбабди. Үнеэдтээ коньки углаад, хатаруулхамнайл үлөө”. Энэ тон буруу һанамжа!

Буряадай гүрэнэй оперо болон баледэй театрай гол хатаршад болохо Булат Раднаев Вероника Миронова хоёр Шэбэртэһээ гарбалтай. Нютагаархиндаа зорюулһан хатарыень иигэжэ доромжолжо болохогүй.

Хүхэ утаан соо

Зүүн Сибириин хүбшэ ой хүсэгдэшэгүй түймэртэ абтаад, хүхэ утаан доро хүнэй амилхань хүндэхэн болоод байна. Ойн түймэр усадхахын тулада горитой ехэ гаргашалга хэрэгтэй. Тиигэхэ арга боломжо үгы хэбэртэй. Илангаяа социальна холбоон соо энэ түймэр зогсоогыт гэһэн уряа үргэнөөр дэлгээгдэнэ. Энэ хүдэлөөндэ мүн лэ мэдээжэ сэтгүүлшэн Лариса Иринцеева оролсобо. Тиихэдээ эсэргүү удхатайгаар иигэжэ мэдүүлбэ: “3 сая гектар зайда түймэр һүжэрөө. Энэ онсо байдал бэшэ гү? Һайндэр, парад, салют, чемпионат болон бусадые хаяя даа! Сибирь абарыт! Засаг баригшад дуулаад, түймэр усадхалгын хэмжээнүүдые абаха ёһотой”

Урданай Улаан-Үдэ

Зүблэлтэ үеын Улаан-Үдын гэрэл зурагуудые Владимир Матханов тунхаглаба. Олоной зосоо дулаахан дурасхаал түрүүлнэ.

БЭРХЭШЭЭЛНАЙ ХААНАҺААБ?

Олонхи бэрхэшээлнүүднай өөрһөөмнай эхитэй гэжэ Далай багша һануулна.