​Эхын жаргал олгуулдаг

Евгения Цыдыпдоржиева

Үзэсхэлэнтэ hайхан байгаалитай Түнхэндэ 1958 ондо үнэр баян ажал­ша малша Дондой Лопсонович Батуев Бадма Дамшиевна Бартаева хоёрой гэр бүлэдэ одхон үри түрэhэн. Эрхэшье hаа, бэрхээр hураhан Евгения Дондоевна Цыдыпдоржиева hургуулияа дүүргээд, Улаан-Үдын эм­нэлгын дунда hургуулида hуража, акушер-гинеколог мэргэжэлтэй болоод, 1980 ондо гүрэн түрын зууршалгаар Яруунын Мужыха руу эльгээгдэhэн.

Гурбан голой бэлшэртэ

Үдэ, Маарагта, Эгэтэ голнуудай уулзуурта, Түхэриг дободо түб бо­лохо түхэлтэй, Молон багшын аба­ралтай Эгэтын-Адаг оршодог. Энэ нютагай бэри, минии шаби Цыдып­доржиев Мүнхын наhанай нүхэр боло­но. Гэр бүлын орёо бэрхэшээлнүүдтэ түрюулэнгүй, наринаар, эбтэй эе­тэйгээр байдалаа тааруулан hуудаг. Хада мэтэ халха болодог наhанайнгаа нүхэрэй үргэмжөөр Евгения Дондоев­на хойшоо таталдангүй, урма зориг­тойгоор, урдаа табигдаhан ажалдаа шуумайн орохо аргатай ябадаг.

Хүйһэ хүндэхэ буян

Омог залуу наhанай долгиндо hэжүүлэн бэхижэжэ, шудалhан мэр­гэжэлэйнгээ оньһо оложо, шадабари­тай аргашадай тоодо орожо, «Эрхим акушер» гэhэн нэрэ түрэдэ хүртэнхэй. Эхэнэр хүн эльгэ нимгэтэй гээд хэлэг­дэдэг. Эгээл энэ эди шэдиеэ хүгжөөжэ, акушер мэргэжэлээ үндэр дээдэ шата­да хүргөө. Нарайлха эхэнэрэй сэдьхэ­лэй байдал заhаха, зааха, урмашуулха талаар ехэхэн дүй дүршэлтэй болон­хой. Нарата дэлхэйн агаараар амилу­улаад, нялха нарай үрииень альган дээрээ абаад, эхынь энгэртэ няагаад, нангин hайхан мэдэрэлынь бадара­алга юунтэй жэшэхээр бэ? Иигэжэ олон хүүгэдэй хоёрдохи эхын нэрэ хайра мүндэлжэ, таhаршагүй зан­гяа болон бэхижэдэг! Анхан буряад арадта эмтэй домтой, буруу hарюуе заhажархидаг, хүйhэ хүндэдэг, Отошо бурханай үршөөлтэд байhан. Жениин угташье Бадма эжынь иимэ шэдитэй байhан ха. Манай Эгэтын-Адагта – Мөөлэйн баабай, Буршайн, Галсанай, Чимитдариин эжынэр суутай байhан даа.

Мүнөө сагай эрилтээр

Эмшэн ба үбшэнтэн хоёрой харил­саан мүнөө сагта тон ондоо болоо. Телефон ба Интернедэй ашаар ута унжагай ээлжээн үгы болоно, гэр­тээ hуугаад, аргашантай амарханаар харилсаха, саг болзороо тодорхойл­хо арга Евгения Дондоевна ажалдаа нэбтэрүүлдэг байна. «Хамаг амитан хаанашье байг, юушье хэг, хүн зондол туhатай байхые оролдог» гэhэн Бур­хан багшын hургаал даган ябадаг бу­ряад арадай басаган үншэн үрөөhэн, үлдэhэн даараhаниие орхихогүй гэhэн бодолоороо хубаалдажа, ниитын мэдээсэлэй таhагуудта нигүүлэсхы сэдьхэлэй үйлэ хэрэг бүтээлсэхые уряалhан бүлгэм байгууланхай.

Ажалай үрэ дүнгүүд

Хүхюу хөөрүү, хүгшэн залууе илгадаггүй зангаараа хүн зондоо хүндэтэй Евгения Дондоевнагай наhанай харгы уужам, сэбэр. Нюта­гаймнай одо заяа хубаалдан ябаhан бэримнай гүрэн түрын анхаралда яhала хүртэнхэй. Хэмжүүргүй ажалай үдэртэй эмшэнэй оролдосые аймагай захиргаан, уласай засаг зургаан анхар­жа, хайра шагналнуудаар урмашууланхай.

2007 ондо Арадай Хуралай Хүндэлэлэй грамотаар, 2013 ондо Буряад Уласай 90 жэлэй ойн медаляар, 2015 ондо Буряад Уласай Засагай газарай шагналаар шагнагдаhан. Олон янзын мүрысөөндэ илажа, бүхэроссиин хэм­жээндэшье илгаржа шадаа. Ниитын ажалда хам ородог, урагшаа hанаатай, шударгы ажалшандаа 2019 ондо Рос­сиин элүүрые хамгаалгын яаман Хүндэлэлэй грамота барюулаа. Эдэ олон шагналнууд – нугархай хурса бодолой, hэшхэлтэй hонор сэдьхэлэй, үнэн сэхэ ажалайнь үрэ дүн болоно.

Үри хүүгэдынь эрдэм бэлиг түгэлдэр

Марианна – Нарhатын Рабкооп-ай ахамад экономист. Золто - аймагай зүблэлэй финансист, Зоя - эжынгээ мэргэжэл шэлэнхэй, арад зоной элүүр энхые аршалан хамгаалха зорилготой.

Ууган хүбүүниинь инженер-меха­ник мэргэжэлтэй, гэр бүлэтэй, үри хүүгэдтэй болоод ябатараа, наhа бараhаар 10 жэл үнгэршэбэ. Аба, эжы, дүүнэрынь Мэргэн ахынгаа Наян Эрдэни хоёрой гарыень ганзагада, хүлыень дүрөөдэ хүргэхэ нангин уял­га урдаа табинхай.

Нарата дэлхэйн жама ёhо

Оршолонгой байдал соо төөришэнгүй, хүн нэрэеэ дээрэ үргэжэ ябаhан Мүнхын гэр бүлэдэ уйдажа гуниглангүй, айжа hүрдэнгүй, уна­жа бутарангүй, сэдьхэл hанаагаа hамарангүй, амгалан тэнюун ажа­мидарха аргатай байнат гээд, үндэр наhанай оройhоо тобшолол хэhүү!

“Холо газарые гаталдаг морин - эр­дэни, хари зониие холбодог басаган - эрдэни” гэдэгээр Түнхэн Ярууна хо­ёрые холбоһон Женя басагаараа адли­хан омогорхожо ябадагаа мэдүүлэе!

Цыдыпдоржиевтанай гэр бүлын архивһаа гэрэл зураг

Б. ДОРЖИЕВА, багшын ажалай ветеран

Эгэтын-Адаг