789
Буряад Уласай Засагай газарай мэдээсэлэй албанай гэрэл зураг
Буряад Уласай Толгойлогшо Алексей Цыденов августын 5-да Улаан-Үдэдэ хабдарта үбшэнэй шэнэ поликлиникын нээлгын баяр ёһололдо хабаадаа.
4,7 мянган дүрбэлжэн метрэй талмайтай шэнэ поликилиникэдэ үдэрэй туршада 250 хүндэ эмнэлгын туһа хүргэхэ аргатай. Хуушан поликлиника оройдоол 500 дүрбэлжэн метрэй талмайда ажалаа эрхилжэ, үдэрэй туршада 70 хүндэ туһа хүргэхэ гэжэ хараалагданхай аад, үнэн дээрээ 140-һөө дээшэ хүн эндэ хандадаг байга.
- Хабдарта үбшэнэй диспансерэй поликилиникын нээлгэн хадаа энэ үбшэ эмнэхэ талаар хүгжэлтын нэгэ шата болоно. Эмнэлгын шанар дээшэлүүлхэ, эмшэдэй хүдэлхэ болбосон оршон байгуулха талаар ажал ябуулнабди. Ажаһуугшад элүүр энхэ ябажа, үбшэлөөшье һаань, һайн шанартай эмнэлгын туһа хүргэхэ аргатай байха гэжэ ажал хэгдэнэ, - гэжэ Алексей Цыденов нээлгын баяр ёһололдо хэлэбэ.
Буряад Уласай Засагай газарай мэдээсэлэй албанай гэрэл зураг
Шэнэ поликлиникэдэ 490,5 сая түхэригэй эмнэлгын мүнөө үеын хэрэгсэлнүүд абтанхай. Үбшэнтэн нэгэ газарта шэнжэлгэнүүдые гарахай аргатай.
- Эхин шатада хабдарта үбшэн эдэ хэрэгсэлнүүдээр элирүүлэгдэжэ, сагтаа һайн шанартай эмнэлгын туһа хүргэгдэхэ, - гэжэ Буряад уласай хабдарта үбшэнэй диспансерэй ахамад эмшэн Инесса Шагдурова тэмдэглэбэ.
Буряад Уласай Элүүрые хамгаалгын яаманда эхин шатада аймшагтай үбшэ элирүүлхэ оршон байгуулха гэһэн зорилго табигданхай. Жэл бүри улас дотор 3 мянганһаа дээшэ зондо анха түрүүшыхиеэ хабдарта үбшэндэ нэрбэгдэнэ. Тиихэдэ хандаһан зоной дүрбэдэхи хүн бүхэн үбшэнэй ехээр һүжэрһэн хойно эмшэдтэ хандана.
Буряад Уласай Засагай газарай мэдээсэлэй албанай гэрэл зураг
- Хабдарта үбшэниие эхин шатада элирүүлжэ, ажаһуугшадта эмнэлгын туһа хүргэхэ гэһэн зорилготойбди. Үбшэнэй ехээр һүжэрөөгүйдэ, хандаһан зон наһа наһалнашье. Орой элирүүлэгдэһэн үбшэнтэн жэлэй туршада наһа барана, энэ тоо доошолуулха талаар ажал ябуулхабди, - гэжэ Буряад Уласай элүүрые хамгаалгын сайдай орлогшо Наталья Бухольцева онсолбо.
Хабдарта үбшэ аргалха һалбари улас дотор хүгжөөхэ талаар ажал үргэлжэлүүлэгдэхэ. Мүнөө 150 һууритай эмнэлгын-лабораторно байшанай барилга ябуулагдана.
Буряад Уласай Засагай газарай мэдээсэлэй албанай гэрэл зураг
Улаан-Үдэдэ уласай онколигическа түбэй барилга 2011 оной август һарада эхилһэн юм. 2016 ондо федеральна һанһаа мүнгэн һомологдохоёо болижо, барилга тогтошоһон байгаа. Ородой Холбоото Уласай Юрэнхылэгшэ Владимир Путинтай Алексей Цыденов уулзахадаа, тус барилга дүүргэхэ хэрэгтэй гэжэ хэлэһэн байна. Тиигэжэ мүнгэ һомолхо тухай Владимир Путин даалгаа һэн гэжэ һануулнабди. Хабдарта үбшэнэй диспансерэй барилга дүүргэлгэдэ 2,7 миллиард түхэриг хэрэгтэй гэжэ тоологдоо. 2018 оной февраль һарада Буряад Уласай Толгойлогшо Алексей Цыденов Ородой Холбоото Уласай Элүүрые хамгаалгын яамантай барилга дүүргэхэ хэрэгтэй мүнгэ һомолхо тухай хэлсээ баталһан байна.
