Бүхэроссиин ажаһуугшадай тоо бүридхэл 2020 оной октябрь һарада болохоор хараалагданхай. Хэды тиигэбэшье, гүрэн дотор энэ ехэ хэмжээ ябуулгада бэлэдхэлэй ажал хэгдэжэ эхилэнхэй.
Ород гүрэнэй тоо бүридхэлгын албанай Буряадтахи таһагай хүтэлбэрилэгшын орлогшо Дора Баиновагай тэмдэглэһээр, бэлэдхэлгын ажал олон бэрхэшээлтэй дайралдана.
- Хүдөө нютагуудай болон аймагуудай захиргаануудтай нягта харилсаа холбоотойгоор хүдэлнэбди. Теэд зарим дарганар маанадтай хүдэлхэеэ һананагүй, - гэжэ Дора Самбуевна халаглана.
Бурятстадай мэдээсэһээр, Буряад Уласай аймагуудта болон хүдөө һууринуудта 285 тусхай комисси байгуулагдаа. Ганса Бэшүүр аймагай Дээдэ Мангиртай һууринай сомоной дарга ажал ябуулжа үгэнэгүй гээшэ. Бусад нютаг нугануудта ааляаршье һаа, ажал хэгдэнэ.
Тоо бүридхэл үндэр хэмжээндэ хэхын тулада нютаг бүхэндэ үйлсын нэрэнүүд, гэр байрануудай тоо элеэр бэшэгдэхэ ёһотой. Юундэб гэхэдэ, тоо бүридхэлгын мэргэжэлтэдэй ажал ябуулгань бэлэн боложо үгэхэ ха юм. Олонхи хүдөө нютагуудта гудамжануудай нэрэ харагданагүй, гэрэй тоо мэдэгдэнэгүй. Зарим сомоной дарганар энэ ажал статистикын албанай мүнгөөр хэжэрхихэ һанаатай. Теэд Ород гүрэнэй Хуулиин ёһоор, энэ үйлэ хэрэг һууринаа болбосон түхэлтэй болгохо ажалай бүридэлдэ ороно бшуу.
Улаан-Үдэ, Северобайкальск, Закаменск, Гусиноозёрск болон бусад хотонуудта болбосон түхэлтэй олон дабхар гэрнүүдэй квартиранууд тоогүй байна.
Мүн тиихэдэ аймагуудай захиргаануудай ашаар нютаг нугануудай хилэ элирүүлхэ хэрэгтэй. Мүн тиихэдэ тэндэ хэды хүн зон ажаһуунаб гэһэн мэдээсэл бэлэдхэлэй үедэ тон шухала болоно.
Һүүлэй мэдээгээр, Буряадта нэгэшье ажаһуугшагүй 9 һуурин тоологдоно. Дора Баиновагай хэлэһээр, эдэ һууринуудые хуулиин ёһоор үгы болгохо хэрэгтэй. Юундэб гэхэдэ, тоо бүридхэлдэ ехэ һаад ушаруулха байна. Мүн тиихэдэ 17 һууринда 1-7 хүн ажаһууна. Һонирхолтойнь гэхэдэ, Сэлэнгэ аймагай нэгэ һууринда мянга гаран хүн ажаһуудаг гээд бүридхэлдэ абтанхай аад, тиишээ мэргэжэлтэдэй ошоходонь, нэгэшье хүн харагдаагүй.
Һүүлэй үедэ Загарай, Бабанта болон Ивалга аймагуудта хэдэн һууринууд Арадай Хуралай сесси дээрэ нэгэдүүлэгдээ. Тэдээн тухай саарһа дансанууд хүсэд бэлдэгдээгүй байна. Тиимэһээ дээрэ нэрлэгдэһэн аймагуудай захиргаанууд энэ ажалаа түргэдүүлхэ болоно.
Тоо бүридхэлэй үедэ хүдэлхэ хүнүүд үсөөн ха. Юундэб гэхэдэ, хүн зонтой харилсаха гээшэ хүндэ ажал. Мүн салин хүлһэниинь бага гээшэ.
Бүхэроссиин тоо бүридхэлгэ 2020 оной октябриин 1-һээ 30 болотор үнгэргэгдэхөөр хараалагданхай. Харин холо оршодог нютаг нугануудта тоо бүридхэл июль һарада эхилхэ. Зарим холын һууринуудта газарай хүрэһэнэй удаа үбэлэй харгыгаар ошожо, тоо бүридхэл эмхидхэгдэхэ.
Буряад Уласаймнай бүхы ажаһуугшад, илангаяа засаг баригша ноёд һайд, сомон дарганар гүрэнэй удха шанартай ажалые гүйсэдөөр хэжэ, тоо бүридхэл Буряадта үндэр хэмжээндэ үнгэрхэ бэзэ гээд найдагдана.