735
Һуралсалай шэнэ жэлдэ Буряад уласта юрэнхы болбосоролой 459 дунда һургуули ажалаа ябуулха. Байгша оной июниин 13-һаа Гүрэнэй түймэрэй хиналтын мэргэжэлтэд Буряад Уласай Болбосоролой болон эрдэм ухаанай яаманай түлөөлэгшэдтэй хамта һургуулинуудта шалгалтын, һэргылэмжын ажал ябуулна.
Ородой Холбоото Уласай онсо байдалай талаар яаманай мэргэжэлтэд можо хоорондын комиссида орожо, һуралсалай шэнэ жэлдэ 311 бэлэн гэжэ тобшолһон байна. Энэнь бүхы һургуулинуудай 68% болоно гээд тэмдэглэлтэй.
- Хиналтын үедэ түймэр унтарааха уһанай хангалта, түймэрэй гараһан тухай дуулгаха дохёо эбдэрэнхэй байгаа. Тиихэдэ түймэрэй саашаа тарахагүй дэбисхэр бог шоройдо дарагдажа, ехэ заһабари буруугаар хэгдэһэн байна. Тиимэһээ табан һургуули мүнөө заһабарилагдаһаар, - гэжэ Ородой Холбоото Уласай Онсо байдалай талаар Буряадтахи хүтэлбэриин даргын орлогшо, полковник Константин Скворец хэлэбэ.
Гүрэнэй түймэрэй хиналтын мэргэжэлтэд түймэрэй гэнтэ гараа һаа, һургуули сооһоо гараха үүдэнүүдые, түймэрэй гараһан үедэ хүнүүдые гуримтайгаар байшан сооһоо гаргаха хүтэлбэри, зайн галаар хангаха хэрэгсэлнүүдые шалгана гээд һануулнабди. Түймэрэй үедэ байшанһаа гарахада, үүдэнүүд бэлээр нээгдэхэ ёһотой юм. Тиихэдэ һургуулиин хүдэлмэрилэгшэдшье гэнэ аюулай болоо һаа, бэлэн байха ёһотой.
Константин Скворецэй тэмдэглэһээр, бүхыдөө уласай һургуулинууд һуралсалай жэлдэ бэлэн. Зарим тэды алдуунууд олдоошье һаа, шалгалтын үедэ тэдэ усадхагдана.
Байгша оной сентябрь һарада Онсо байдалай талаар яаманай мэргэжэлтэд һургуулинуудта хэшээлнүүдые үнгэргэжэ, аюулай болоо һаа, ямар хэмжээ абахаб гэжэ харуулха, хөөрэхэ юм.
Фото Анны Огородник
