«Мүнөөдэрэй Монгол» - Буряадай гэрэл зураг буулгагшын нюдөөр

Александр ГАРМАЕВАЙ гэрэл зураг

Августын 19 – гэрэл зурагай үдэр. Гэрэл зурагша намда энэ үдэр онсо удха шанартай. Юуб гэхэдэ, гэрэл зураг хадаа миин лэ һонирхолни бэшэ, юрэ ажалнишье бэшэ, харин ажабайдални гээшэ. Тэрэ шухала үйлэ хэрэг, һонирхолтой агшан зуура, үзэсхэлэн гоё газарнуудые, дуратай хүнүүдые мүнхэлдэг, мүн үнгэрһэн саг руу, дабтагдашагүй үедэ “бусаадаг” шэдитэй.

Александр ГАРМАЕВАЙ гэрэл зураг

Тиимэһээ тусхай үдэртэй байһанииньшье гайхалгүй. 2009 ондо Австралиин гэрэл зурагша Корске Ара гэгшын үүсхэлээр августын 19-дэ тэмдэглэгдэжэ эхилээ. Зүгөөр гэрэл зураг буулгаха оньһо зохёохо талаар түрүүшын алхам аяар холын 1839 ондо Луи Жак Манде Дагера гэжэ хүн хэһэн юм...

Александр ГАРМАЕВАЙ гэрэл зураг

Һүүлэй долоон хоногой туршада “Монгол орон мүнөө - 2019” гэһэн түсэлдэ хабааданаб. Гэрэл зурагшадай уласхоорондын бүлгэм Монгол сайхан орондо суглараад, энэ гайхамшагта газар дайдые гэрэл зурагууд дээрээ мүнхэлхэеэ аяншалгада гараа. Хабаадагша гүрэн бүхэнһөө хоёр-хоёр гэрэл зурагша ерээ. Турциһаа Япон хүрэтэр дэлхэйн тон ехэ мэдээсэлэй агентствэнүүдэй 26 гэрэл зурагша хабаадаа. Манай гүрэниие би, мүн тиихэдэ “Ород гүрэн мүнөөдэр” гэһэн уласхоорондын мэдээсэлэй агентствын Владимир Астапкович түлөөлөөбди. Эдэ үдэрнүүдтэ Занабазарай нэрэмжэтэ музейдэ гэрэл зурагуудаймнай үзэсхэлэн дэлгэгдээ. Шэлэн абалгын дүнгүүдээр хэлэхэ болоо һаа, манай гэрэл зурагууд аһан эрхимүүд гэжэ тоологдоно. Зарим тэдыень уншагшадайнгаа һонорто дурадханабди.