1094
Буряад Уласай сойлой сайд Соёлма Дагаева августын 27-до албан хэрэгээр Захаамин аймагаар ябаба.
- Үглөөнһөө Шара-Азарга һуурингай Соёлой байшан хэр зэргэ заһабарилагдажа байнаб гэжэ харааб. Тэрэнэй заһабарилгада Үндэһэн түсэлэй хэмжээндэ мүнгэн һомологдоо һэн. Ехэ юумэн хэгдээд байна: шала, үһээнь һэлгэгдээ, шэнэ евро-сонхонууд табигдаа, 4 пеэшэн баригдаа. Аймаг баһа өөрынгөө мүнгэ оруулжа, ханануудыень газааһаань бүрихэ гэжэ байна, - гэжэ Соёлма Дагаева мэдээсээ. - Багшанарай заншалта суглаанда Засагай газарай шагналнуудые барюулаабди. Мүн һургуулида орожо байһан үхибүүдтэ ниигэмэй хамгаалгын яаманһаа ном, дэбтэр болон бусад бэшэгэй хэрэгсэлнүүдээр дүүрэн үргэбшэнүүдые бэлэглээбди. Байгша ондо аймагай һургуулинуудта ажалда ороһон залуу багшанарыешье амаршалаабди.
Тиихэдэ Соёлма Дагаева Захаамин аймагай хүдөө һууринуудай соёлой эмхи зургаануудай байшангуудые хараа. Хамни нютагайхид өөһэдын гараар һандалинуудые бүтээжэ табиһан байна. Хуртага болон Бургалтайн-Адагта 2020 ондо Ородой Соёлой яаманһаа ерэхэ мүнгөөр заһабарилгын ажал хэгдэхэ юм.
Аймагай засаг дарга Сергей Валерьевич Гонжитовой хэлэһээр, Соёлой байшангүй хүдөөдэ байжа болохогүй. Суглаа хуралнуудһаа эхилээд, элдэб һайндэрнүүд, ойн баяр, түрэ хуримуудшье эгээл тэндэ үнгэрнэ ха юм. Соёлой байшангай үгы болоо һаа, арад зоншье нүүжэ эхилхэ бшуу.
Буряад Уласай соёлой яаманай мэдээсэлэй албанай гэрэл зураг
