1622
“Чистые Игры” гэһэн бүхэроссиин хүдэлөөндэ Закаменск оролсобо. Тиигэжэ хотын захиргаан бог хаядаһа арилгаха талаар хоёр акци үнгэргөө.
Августын 23-да Закаменскда “Особенности национальной уборки” гэһэн наадан үнгэрөө. Экологиин квестдэ бог арилгаха, илгаха талаар урилдаба. Хабаадагшад 3,5 тонно жэнтэй 300 гаран мэшээг бог суглуулаа.
Удаань августын 26-да Зэдэ голой эрьеын “Поповка” гэжэ газарта “Захаамин аймаг” муниципальна байгууламжын захиргаанай ажалшад бог хаядаһа хуряагаа. Хотынгоо ариг сэбэрые сахиха, экологиин байдал һайжаруулха ба бог хаядаһа зориһон тээгээ хаяхагүй гэһэн асуудалнуудта ажаһуугшадай анхарал хандуулха зорилготой хэмжээ ябуулганууд эмхидхэгдэнэ.
Бог хаядаһа арилгаха талаар нютаг можын «ЭкоАльянс» оператор хэмжээ ябуулга зохёон байгуулагшадые дэмжэжэ, суглуулһан богыень түлбэригүй гаргажа үгөө.
- Хүн бүхэндэ оршон тойрон байгаалида гамтайгаар хандаха һанал бодол түрэхэ гэжэ найданабди. Бидэ, Байгалай эрьедэ үндыһэн уласай ажаһуугшад, ерээдүйн үе тухайгаа һанаата болохо ёһотойбди, - гэжэ «ЭкоАльянс» бүлгэмэй захиралай орлогшо Надежда Пихеева хэлээ.
Бог суглуулха, илгаха талаар командын «Чистые Игры» гэһэн урилдаан 2014 онһоо гүрэн дотор үнгэргэгдэнэ. Энэ болзорто 280 хотонууд сэбэрлэгдээ, хэмжээ ябуулгануудта 48 мянган хабаадагшад 1 мянган тонно үлүүтэй бог хуряаһан байна. Тус хүдэлгөөн хадаа бог хаядаһа арилгаха соёл дээшэлүүлхэ, бог хаядаһа илгажа суглуулха ба болбосоруулха гээһн гол зорилготой юм. Эмхидхэгшэд газарай зураг бэлдэдэг, таабаринуудые ба тусхай даабаринуудые һанадаг. Команданууд дохёогоор бог хаядаһа олодог ба суглуулдаг. Тэдэнэр суглуулһан бог хаядаһанай хэмжээгээр баллнуудые абажа, илагшад шагналда хүртэдэг.
Буряад Уласта “Чистые Игры” гэһэн хүдэлөөндэ Северобайкальск, Гусиноозёрск хотонууд, Баргажанай-Адаг тосхон ба Горячинск һуурин хабаадаа.
Буряад Уласай Засагай газарай мэдээсэлэй албанай гэрэл зураг
