1659
Мүнөөдэр, августын 30-да, Кабанскын аймагай Энхалук һууринда “Мүнгэн” волонтёрнуудай Байгалай хоёрдохи хуралдаан эхилээ. Буряад орондо һайн дуратанай ажалай дүй дүршэлэй андалдаанда гүрэнэй долоон можо нютагһаа - Санкт Петербургһаа Владивосток хүрэтэр, мүн баһа Монгол Уласай аха наһанай 150 гаран түлөөлэгшэд суглараа.
Алас Дурнын тойрогто ба Росси дотор ахамад зонтой хүдэлхэ ажалай ёһо заршам, ута наһа наһалха, тиихэдэ Буряад орондо волонтернуудай хүдэлөө хүгжөөхэ талаар Ородой Холбоото Уласай Гүрэнэй зүблэлэй дурадхалнууд болон Юрэнхылэгшэ Владимир Путинай даабари хэр зэргэ бэелүүлэгдэнэб гэһэн асуудалнуудаар хуралдаанда хэлсэхэ юм.
Һонирхолтой программа хэмжээ ябуулгада бэлдэгдэнхэй. «Походка на подиуме 50 +», «Смехотерапия», «Северная ходьба» гэһэн мастер-классууд, элүүржүүлгын цигун упражнени болон бусад хэмжээ ябуулганууд үнгэрхэ. Тиихэдэ “мүнгэн” волонтернууд өөрын сомонуудай һүлдэ дуунтай танилсуулжа, «Вместе 1000 лет» гэһэн урилдаанда хабаадаха, өөһэдын түсэлнүүдые хамгаалха, «Предприниматель 55+, миф или реальность?», «Одобрено старшим поколением» гэһэн программануудтай танилсаха юм.
Тус түсэл Юрэнхылэгшын грантын жасын, Буряад Уласай Ниигэмэй хамгаалгын яаманай, «Самарская губерния» жасын, «Серебряный возраст» альянсын ба Волонтернуудай түбэй эблэлэй дэмжэлгээр бэелүүлэгдэнэ гээд тэмдэглэлтэй.
“Буряад ороной мүнгэн волонтернууд” гэһэн ниитын эмхи Байгалай буян үйлэдэлгын жасада үндэһэлэн 2018 оной июнь һарада байгуулагдаа һэн. Буряад уласай бүхы шахуу аймагуудые энэ хүдэлөөндэ хабаадана.
Сибирьтэ ба Алас Дурна зүгтэ “мүнгэн” волонтёрнуудай анха түрүүшын Байгалай хуралдаан Баргажан аймагай Максимиха һууринда 2018 ондо үнгэрөө һэн. Хүдэлөөндэ “мүнгэн” волонтернуудай һургуули байгуулагдаа, тэндэнь ахамад наһатай хүнүүдһээ 22 эдэбхитэн һуража гараа. Мүн баһа Аха наһатанай гоо һайханай һургуули, 4 бүлэгүүд (“Леди Шик”, «Гоемсуу», «Семейский хоровод» ба вокальна бүлгэм «Дива») бүхы уласаар ябажа наада табидаг. “Буряад ороной мүнгэн волонтернууд” бүхыдөө ахамад наһатанай хабаадалгатай 100 гаран түсэлнүүдые ба хэмжээ ябуулгануудые бэелүүлһэн байна.
Буряад Уласай Засагай газарай мэдээсэлэй албанай гэрэл зураг
