1827
Жэлһээ жэлдэ һэеы гэр гадаадада олоор худалдадаг болоно. 2016 ондо Монгол Уласһаа 1500 һэеы гэр экспортодо гаргагдаһан һаа, 2018 ондо үшөө нэгэ мянгаар нэмэжэ, 2500-да хүрэһэн байха юм.
Гадаада оронууд руу монгол гэрэй худалдаанһаа жэлдээ 5 млрд түхэригэй оршо ороно. Америкын Нэгэдэмэл Улас, Япони, Солонгос, Австри, Британи, Итали, Франци, Испани зэргэ гүрэнүүдһээ захил олон ороно ха.
Тиихэдэ Америкэ түбидэ 90 мянган, Европодо 49 мянган, Азиин оронуудта 70 мянган, Австралида 17 мянган монголшууд ажаллажа амидардагынь эшэгы гэрэй экспортые нэмэгдүүлхэдэ нүлөөлнэ гэжэ шэнжэлэгшэд үзэжэ байна.
2009 ондо Копенгагенда үнгэрһэн уур амисхалай өөршэлэлтын (по изменению климата) хуралай үеэр монгол гэрэй хэлбэритэй эшэгы дулаалгатай байрые “XXI дугаар зуунай эгээл эрхим бүтээл” гэжэ тодорхойлогдоһон байгаа. Хүн түрэлтэнэй элүүр мэндэдэ туһатай үрэ бүтээлые үлүүдэ үзэжэ, байгаалитайгаа ойро байхые эрмэлзэлдэг болоһоноор монгол гэрые һонирходог боложо, элдэб шэглэлээр ашаглажа эхилээ. Соёл уралигай хэмжээ ябуулга, түрэ хурим, үзэсхэлэн худалдаа, ресторан, зошон буудал, аяншалагшын бааза гэхэһээ байтагай дуу хүгжэм бэшэлгын студи болгоһоншье байдаг.
Монголдо «Цомцог гэр» гэжэ нэгэ компани монгол гэрэй үйлэдбэридэ инноваци шэнгээжэ, өөрын нэрын бүтээл болохо шэнэ бренд гаргаһан байна. «Цомцог гэр» мүнөө сагай коттедж орлохо болбосон түхэлтэй, уужам һаруул мүртөө монгол үндэһэнэй хэб шэнжые оруулһэн гэр бии болгохо зорилготойгоор шэнэ түхэлэй гэр зохёон бүтээгээ. Цомцог гэрэй үлүү һайн талануудынь гэбэл: хүсэһэн газартаа амидарха боломжо олгоно; байгаалида гамтай эко оршон; уужам һаруул орон зай; гэр соо сэбэр агаар; гадаада дотоодын аяншалагшадые татаха юм.
Манай Буряад орондо һэеы гэрнүүд эндэ тэндэ баһал баригдадаг болоо. Һэеы гэр хэхэ үйлэдбэришье бии болоно. Байгал нуурай Ойхон арал дээрэ аяншалга хүгжэжэ эхилээд, һэеы гэр олоор баригдана. Манай малшад һэеы гэрээ хүдөөдэ баряад байха дуратай болоно.
Гэрэл зураг tsomtsog.mn
Автор: Бадмажаб ГЫНДЫНЦЫРЕНОВ
