1253
Буряадай болбосоролой ба эрдэм ухаанай сайдай орлогшо Валерий Поздняковой хүтэлбэри доро Улаан-Үдын үмсын хүүгэдэй сэсэрлигүүдэй хүтэлбэрилэгшэдтэй зүблөөн үнгэргэгдэжэ, хүүгэдэй үмсын сэсэрлигүүдтэ ябадаг үхибүүдэй түрэлхидэй түлбэриие нютагай засагай хүүгэдэй сэсэрлигүүдэйхидэ адли болгохо асуудал хэлсэгдээ. Мүн “Буряад Уласай сахим болбосорол” гэһэн байгуулгада хүдэлмэри эмхидхэлгэдэ анхарал хандуулагдаа.
Байгша оной июль соо үмсын хүүгэдэй сэсэрлигүүдтэ ябадаг үхибүүдые хараһанай түлөө мүнгэн тэдхэмжын хэмжээе 3000 түхэригһөө 6000 түхэриг хүрэтэр дээшэлүүлһэнэй ашаар түрэлхидэй түлбэриие нютагай засагай хүүгэдэй сэсэрлигүүдэйхидэ адли болгохо тухай шиидхэбэри абтаа һэн гэжэ һануулая. Буряадай Толгойлогшо Алексей Цыденовэй зүблөөнэй удаа абтаһан тогтоолой түлэбые Буряадай сан жасын ба эдэй засагай яамануудтай, Ородой Холбоото Уласай Юстициин яаманай Буряадтахи управленитэй зүбшэгдөө. Даб дээрээ тэрэнь Буряадай Прокуратурада зүбшэлгэдэ оронхой.
- Тогтоолой түлэб соо 2019 оной сентябриин 1-һээ хүсэндөө орохо гэжэ тогтоогдонхой. Бидэ, гүрэнэй засагай зургаан, үмсын эмхиин ажаябуулгын түлөө урид мүнгэ түлэхэ аргагүйбди, харин гаргашануудыетнай тэхэрюулэн бусаанабди. Тиимэһээ мүнгэн тэдхэмжэ тогтоогдоһон болзортоо үзүүлэгдэхэ, - гэжэ Валерий Поздняков хэлээ.
Тус тогтоолой түлэбэй зүбшэлгэ сентябриин хуушаар түгэсхэгдэхөөр хараалагдана.
Буряадай Болбосоролой ба эрдэм ухаанай яаманай һургуулиһаа урид ба юрэнхы болбосоролой таһагай дарга Татьяна Елистратовагай тэмдэглэһээр, үхибүү хараһанай түлөө мүнгэн тэдхэмжын хажуугаар болбосоролой ажаябуулгын түлөө мүнгэн тэдхэмжэ жэл бүхэндэ нэмэгдэдэг. Мүнөө жэл хэмжээниинь 4 мянган түхэриг юм. Тиихэлээрээ тус мүнгэн тэдхэмжэнүүд дүн хамтадаа 10 мянган түхэриг болохо.
Энээнһээ гадуур Ородой Холбоото Уласай Гэгээрэлэй яаманай үүсхэлээр 2020-2022 онуудта 8,4 миллиард түхэриг гүрэндэмнай һургуулиһаа урид болбосоролой болон үмсын хүүгэдэй сэсэрлигүүдтэ 1,5 – 3 наһатай багашуулые хараха 8600 бүлэг байгуулха хэрэгтэ, мүн тиихэдэ болбосоролой управленинүүдэй мэргэжэлтэдэй ба үмсын хүүгэдэй сэсэрлигүүдэй хүтэлбэрилэгшэдэй (дүн хамта 5000 хүн) мэргэжэл дээшэлүүлгэдэ шэглүүлэгдэхэ.
Буряад Уласай болбосоролой ба эрдэм ухаанай яаманай гэрэл зураг
