​​Зүрхэ хүмэрюулһэн гэрэл зураг

Хоёр басагад уулзаад:

- Шимни яагаа хүхюутэй ябанабши? Зунай сэсэгэй дэльбэ дээрэ нектар суглуулжа ябаһан зүгы шэнги эрбэгэнэнэш? Али ажал дээрээ шанда, бэлэгтэ хүртөө гүш? – гэжэ Норжомоһоо Ханда басаган һураба. Норжомо халаадайнгаа хармаанһаа гэрэл гаргаад, уралаа шүмбылгэн нюураа хараад:

- Намдашни ялада унааш гэһэн гэрэл-соносхол ГАИ-һаа ерээ. Ой, энэ гэрэл зураг дээрэ сэбэрхэн гээшэмни аргагүй. Одоол хүбүүдэй зүрхэ хүмэрюулхэ арга олдобо. Ходол эрбэгэнэжэ ябахань хашартай болоо.

Хоёр хүбүүдэй хөөрэлдөөнһөө

Хоёр хүбүүд газаа хорой дээрэ һуунхай хөөрэлдэнэд:

- Дүү хүбүүншни хэдытэй болооб?

- Жэлтэй болоо, яагааб?

- Яагаа һонин юумэн гээшэб. Минии гүлгэн баһа жэлтэй болоо ха юм. Мүнөө хүлдэ оронхой, гүйжэ ябадаг.

- Эндэшни гайхалтай юумэн үгы. Шинии гүлгэн дүрбэн хүлтэй ха юм, тиимэһээ унахаяа айдаггүй, - гэжэ харюусаба.

Хоёр тушаалтай

Хоёр наһатай хүдөөгэй үбгэд уулзаба:

- Зай хөөрэл даа, үүри. Амаралтада гараад, гэртээ хүс гэтэрээ эдеэлээд диван дээрэ гэдэһээ эльбэжэ хэбтээд, телевизор харадаг гүш?

- Юунэйшни хэбтэлгэн бээ-э! Бишни мүнөө хоёр тушаалтайб. Шабааһанай ноён, шабгансын зараса. Үглөөгүүр үхэр малайнгаа шабааһа орхиноб, дэлгүүр ошожо эдихэ юумээ суглуулаад, эмэй сангай байшан орожо, эм дом абанаб, үдэшэ болоходо түлеэ залһаа оруулнаб, үдэшэ үглөөниинь галаа түлинэб. Энэ хоёр тушаалһаа боложо, амаралта гээшые мэдэнэгүйб.

Шүлэгшэ дууша үбгэжөөлнүүд

Хоёр нүхэд уулзаба. Дүтэ холын һонин һорьмойгоо хөөрэлдэбэд. Нэгэ нүхэрынь нүгөөдэдөө хандажа:

- Үтэлжэ хүгшэржэ ябаашье хадаа, бишни шүлэг бэшэдэг болооб. Шагналши.

Үүдэн шүдэнэй унаашье һаань,

Үмдэн соохим занханаараа.

Араан шүдэнэйм унаашье һаань,

Ала соохим занханаараа.

Хажуудань байһан нүхэрынь тодожо абаад,

- Бишни шамһаашье дутанагүй хэбэртэйб, шагналши:

- Араан шүдэнэй унабашье,

Алтан шүдэн запастайб.

Аяг бэеын үтэлээшье һаань,

Аша гуша запастайб.

Үүдэн шүдэнэй унабашье,

Мүнгэн шүдэн запастайб.

Урихан шарайнгаа уршыгаашье һаань,

Үри хүүгэд запастайб.

Тэдэ хоёр ехэл өөрынгөө шүлэгүүдтэ олзуурхан, шабгансануудтаа ошожо уншая гээд, дахасалдан ошобод.

-Үльтирхэдөө шүлэ гарахагүй, үбгэрхэдөө ухаа орохогүй гэһэн сэсэн мэргэн үгын та хоёрто зорюулагдаһан байһаниинь элирбэ даа, - гэжэ даруу номгон Дари хүгшэн тэдэнэй зүрхэ дараба.

Шүлэгшэ хоёройнгоо һанаа тэгшэлжэ, битнай баһал шүлэг зохёогоод, хэндэшье уншахаа ойлгожо ядажа байгаа һэм, шагнагты!

Дулаан хабарые угтажа,

Дублёнкоёо хэдэрээд һуунаб.

Сэлмэг үдэрые хүлеэжэ,

Сапожкоёо углаад һуунаб.

Нарата үдэр хүлеэһээр

Нооһон оймһотоёо һуунаб.

Малгай дэгэлээ үмдэһөөр

Май һараяа угтахам.

Хоёр үбгэд альгаа ташажа, шимнай одоол ухаангир шүлэгшэн байнаш гэжэ байжа һорһон малгай үмдэхүүлжэрхиһэндээ баярлажа, үнэгэн мэхэ гаргажа, урда хойнонь орожо, үсэгэлдэр орхиһон сэржэмэйнь архииень гартаа оруулбад.

Эдуард Будаев