​​ПАРОДИ

Дууряалга

- Захааминай Нуртын ирагуу найруулагша Валерий Цыбиковай шүлэгүүдые уншаад, эжэлүүдгүй шоглохо дуран хүрөө. Тиигээд нэгэ хэдэн шүлэгтэнь пароди бэшэжэ туршаһанаа олоной һонорто дурадханаб, - гэжэ гуурһа нэгэтэ Басаа Валерий бэшэнэ.

Хадые хүндэлэн гарахадам,

Хүйтэн гээшэнь аргагүй.

Ханилһан нүхэртэйгөө һуухадам,

Жаргалтай гээшэнь сэгнэшэгүй.

Нуртаяа хүндэлэн гарахадам,

Намагтай гээшэнь аргагүй...

(Валерий Цыбиков. “Сэгнэшэгүй”)

Пароди:

Хадые хүндэлэн гарахадам,

Хүйтэн гээшэнь аргагүй.

Ханилһан нүхэрөө озоходом,

Халуухан гээшэнь сэгнэшэгүй.

Нуртаяа хүндэлэн гарахадам,

Намагтай гээшэнь аргагүй.

Наһанайгаа нүхэрые дарахадам,

Наартай гээшэнь садашагүй.

Добые хүндэлэн гарахадам,

Даарахаар һалхитай, тэсэшэгүй.

Дурлаһан шангаар тэбэрихэдэм,

Дулааханш гээшэнь аргагүй.

Түгэсхэл:

Добуунии хүндэлэн гарахадам,

Дайдам уняартаат, баярлуулбагүй.

Дангинаяа хүндэлэн харахадам,

Дарбиилгаад хамараа, хэрэглэбэгүй.

II

Үндэр дээрэһээ харахадам,

Үргэн нютагайм холо гээшэнь.

Үетэн нүхэдөө һанахадам,

Ухааем шэмэглээд гоё гээшэнь.

Хада дээрэһээ харахадам,

Хабтагай нютагайм гоё гээшэнь...

(Валерий Цыбиков. «Гоё гээшэнь»)

Иимэ пароди:

Үндэр дээрэһээ харахадам,

Үргэн нютагайм холо гээшэнь.

Үбсүүн өөдэнь абирхадам,

Үндэгэшөөд дороһоом гоё гэшэнь.

Хада дээрэһээ харахадам,

Хабтагай нютагайм гоё гээшэнь.

Ханилһан нүхэрөө һанахадам,

Хүлэрөөд үнөөхим, һонин гээшэнь.

Табхар дээрэһээ харахадам,

Таляан нугымнай дүтэ гээшэнь.

Танилсаад, ханилаадябахадам,

Таатай хэлэшэгүй гоё гээшэнь.

Уулын үндэрһөө харахадам,

Үзэсхэлэн гэдэгэйнь гоё гээшэнь.

Үзөөд, дээрэһэйнь буухадам,

Үзэлэй һонёор жэрэгэд гээшэнь.

III

Аята голойнгоо эрьедэ

Ардаг хонгорни хүлеэнэл бииз.

Анхан түрэһэн нютагтаа

Амараг гансам хүлеэнэл бииз.

Байгал далайнгаа эрьедэ

Баталһан гансам хүлеэнэл бииз...

(Валерий Цыбиков. “Хүлеэнэл бииз”)

Иимэ пароди:

Аята голойнгоо эрьедэ

Ардаг хонгорни хүлеэнэл бииз.

Амарагаа хүлеэжэ ядахадаа,

Анда нүхэртэм гаранал бииз.

Байгал далайнгаа эрьедэ

Баталһан гансам хүлеэнэл бииз.

Хүлеэжэ намайгаа ядахадаа,

Хүршэдэм хадамда гаранал бииз.

Залууһаань лутаар дурлаһан

Захаамин хайратай нүхэр бииз.

Заяатаяа хүлеэжэ ядашаһан

Зоболонтой хүгшэрһэн эхэнэр бииз.