​АРАД ЗОНОЙ АБАРАЛТА

Амар сайн, хүндэтэ уншагшаднай! Тантаяа золгохо аргагүй байһандаа хүлисэл гуйнаб. Теэдшье социальна холбоон соо дэлгэгдэдэг һүүлэй һонинуудые намһаа дээрэ мэдээ аабзат. Гэбэшье зарим тэдыень нэрлэнгээ өөрынгөө хандаса тунхаглаха хүсэл бии.

Сарюуна Эрдынеевагай гэрэл зураг

Табан хушуун малда табигдаһан хүшөө

Сентябриин 15-да Асагадай талаар ябаад ерэхэ аза тудаа. Намарнай хүсэндөө орожо, хүбшэ ой шара «хүнжэлөөр» хушаглажа байна. Эндэ тэндэ үсөөн тоото үхэр малай бэлшэжэ ябахые харахада, сэдьхэлдэ дулаан. Ерээдүйдэ табан хушуун малнай жэнхэни хэбээрээ тала бүрхөөн тараха ёһотой. Тиигэхын тулада уг шуһыень һэргээхэ гэжэ эрдэмтэн Һасаранай Булад бүхы наһаяа зорюулаа. «Бүүбэй» хонин бүхы Буряадтаа мүнөө эрилтэтэй болонхой. Харин үндэһэн буряад үхэрэй уг шуһа һэргээжэ үрдидэг лэ һаань, буряад арадта ашагтай ямар ехэ хэрэг бүтэшэхэ һэм даа. Саг ябажал байна...

Агууехэ цанид-хамба лама Агван Доржиевай түрэһэн газарта Табан хушуун малда зорюулһан хүрэгүүдэй бодоһониинь ехэ удхатай. Эгээл тиимэһээ нээлгын баяр ёһололдо Буряадаймнай урдаа хараха хүбүүд барандаа оролсоо. Буряад Уласай Толгойлогшын орлогшо – хүдөө ажахын болон эдеэ хоолой яаманай сайд Даба-Жалсан Чирипов, Буряад Уласай Арадай Хуралай Түрүүлэгшын орлогшо Баир Жамбалов түрүүтэй һунгамалнууд Зоригто Цыбикмитов, Аркадий Цыбиков, Яруунын, Хориин, Хэжэнгын аймагуудай засага дарганар Цыденжаб Шагдаров, Юрий Ширабдоржиев, Геннадий Лхасаранов гэгшэд энэ буянта хэрэгэй бүтэһэндэ баяр талархалаа мэдүүлээ. Асагад нютагай хүрьгэн, эдэбхи ехэтэй Баир Долгоров энэ хүрэгүүдые байгуулха тухай һанаашалан бэелүүлжэ шадаһан байна. Һайн даа!

Сарюуна Эрдынеевагай гэрэл зураг

Буряад Уласай Засагай газарай үмэнэһөө болон Арадай Хуралай зүгһөө шагналнууд барюулагдаа. Нээлгын баяр ёһололдо оролсоһон аха захатан болохо, Хориин Үдын ажахые удаан сагта үндэр амжалтануудтайгаар ударидаһан Социалис Ажалай Герой Цыремпил Жигжитович Ширабдоржиевта, мүн эрдэмтэн Һасаранай Буладта болон бусадта шагналнууд барюулагдаа. Иигэжэ аха захатанаа хүндэлжэ, хэһэн хэрэгыень сэгнэжэ, урмашуулгын тэмдэгүүдые барюулжа байхадань, ямаршье һайн гээшэб!

Сарюуна Эрдынеевагай гэрэл зураг

«Талын нүүдэлшэн» гэһэн аяншалгын түб Асагадай хажууда байгуулха тухай нютагаархидһаа зүбшөөл гуйһан суглаан арбан жэлэй саана болоһон гээд, «Жассо-тур» компаниин захирал Светлана Цыбикдоржиева социальна холбоон мэдүүлээ бэлэй. Тэрэ гэһээр хэды олон юумэн тэндэ хэгдээд, «Нүүдэлшэдэй ая дуун» гэжэ уласхоорондын хэмжээнэй фестиваль үнгэргэгдэнэ гүб даа. Асагадай дасанай дэргэдэ бодоһон табан хушуун малда зорюулһан хүшөө харангаа, дэлхэйн аяншад «Талын нүүдэлшэн» руу таатай морилхонь гээшэ!

Хүшөө нээлгын баяр ёһололой хэмжээн соо үндэһэн наадануудые үргэжэ ябаһан баһа нэгэ бэрхэ хүбүүн Алексей Гыргенов Һээр шаалганиие болон шагай наада үнгэргөө. Тиигэхэдэнь хүдэр шамбай хүбүүдэй дундаһаа илагшадта Үбэр Байгалай горнорудна байгуулга шангуудые барюулаа.

Үнөөхи хүдэлөөн

Үнгэрһэн зун һунгалтын үмэнэхи идхалгын ажал ябуулганууд тухай үргэлжэ дуулгажа байгаа бэлэйб. Сентябриин 8-да дүнгүүд эли болоо. Улаан-Үдын мэрэй тушаал эзэлхын түлөө һунгалтада булигдаһан Вячеслав Мархаевай тала баригшад Соведүүдэй талмай дээрэ буһалгаа эмхидхэжэ, шаг шуяа табяа. Хаана үнгэрһэн юумэ нэхээ гээшэб? Ородууд хэлэдэг гүбэ: «после драки кулаками не машут».Тиимэһээ шүүгдээ хадаа шүүгдээ. Омогтой ябаха байгаал даа. Энэ минии һанамжа. Тиихэдэ Юбилейный паркда засагай зүбшөөлтэй митинг зарлагдажа, Буряад Уласай Толгойлогшо Алексей Цыденов Вячеслав Мархаев хоёр урда урдаһаа харалсан, арад олоной урда һанаһанаа хэлээ. Теэдшье баһа бэе бэеэ шагнанагүй. Бэе бэеэ хүндэлжэ һураха байгаалди даа...

Олон зоной сухал ехэ. Сухал дундаа юушье хэхээр ха юм. Хүниие дэбһээдшье гарашахадаа торохогүй. Тиимэһээ сухалаа тараагаад, номгороод, хөөрэлдөөгөө үргэлжэлүүлхэ аабза гээд найдагдана.

Вячеслав Мархаевай хэлэһээр, Россида улад зон муу ажаһууна. Юундэ? Ажал хэхэ хэрэгтэй, орон дээрээ хэбтэхэдэ, хэн бэлэн юумэ асараад үгэхэ юм? Тиимэ бэзэ? Теэдшье ноёд һайд баһа үлүү гарана. Ажалша зоноо дарана, химэлнэ, салингыень багаар түлэнэ. Өөдэлхэ нара улад зон харанагүй. Иимэ байдалда алтан дундыень яагаад баримталхаар бэ? Загаһан тархиһаа үжэдэг. Дээрэһээл хуу эхитэй гэжэ бидэ ойлгонобди, мэдэрнэбди. Муу байдалһаа хүнэй сэдьхэл муудана, доройтоно. Һайн ябаа һаа, юу иигэжэ сухалдаха һэм? Тиихэдэнь зариманай тархи зорюута эрьюулээд табижархидаг хүйхэрнүүд байна.

Хүдэлөөн боложол байха хэбэртэй. Буряадта бэшэ һаа, ондоо тээ... Буу шуугүйгөөр, хубисхалгүйгөөр энэ хүлгөөтэ байдалые дабаһайбди. Ом мани бадме хум.