716
Хүн зон гэртээ һууха баатай болоходоо, газаа досоохиёо эдэбхитэйгээр сэбэрлэнэ. Энэнь һайн. Зүгөөр түймэрнүүд олошорно.
Буряадай гүрэнэй түймэртэ эсэргүүсэлгын албанай захирал Сергей Андриевскиин хэлэһээр, апрелиин 6-һаа 12 болотор уласай аймагуудта 248 түймэр бүридхэлдэ абтаа юм. Нёдондо энэл хугасаада 210 ушарай тохёолдоһые хараадаа абабал, аюулай дайралдаха ушар 18 хубяар дээшэлээд байна. Түймэр сарагшад мартын 30-һаа апрелиин 11 болотор хагда болон бог шорой галдаһанһаа һүжэрһэн түймэрнүүдые унтараахаяа 291 дахин тэмсэлдэ гараһан байха юм. Бүхыдөө 464,8 гектар газар галда абтаа.
- Түймэр ехэнхидээ хүнэй зэмээр гарана. Гэр бараандаа байха гуримай тогтоогдоод байхада, хүнүүд хото хорёогоо сэбэрлэжэ, хатанхай ногоо набша, бог шоройгоо галдана. Теэд түймэртэ эсэргүүсэлгын онсо гурим тухай баһа бү мартаял даа. Мүнөөтнай түймэрэй аюултай хаһа эхилэнхэй ха юм. Тиимэһээ юумэ галдахань хорюултай, - гэжэ Сергей Андриевский Һэргылнэ. Түймэртэ эсэргүүсэлгын онсо гурим эбдэгшэд 4 мянганһаа 5 мянган түхэриг хүрэтэр ялада унаха гэжэ һануулая.
