296
Мартын 13-най мэдээгээр, Буряад Уласта 2019-nCoV гэһэн коронавирусаар үбшэлһэн хүн үгы.
Энэ үбшэнэй дэлхэйдэ ехээр һүжэрһэн сагһаа хойшо улас дотор эпидемиологическа байдал шэнжэлэгдэжэ, Ородой Холбоото Уласай гүрэнэй хилын Буряадтахи талын оролго-гаралгын пунктнуудта санитарна-контрольна хиналта шангадхагдаа.
Короновирусна шэнэ инфекци һэжэглэһэн ушарнуудта эмшэд ямар хэмжээнүүдые абахаб гэжэ тогтоогдонхой. Энэ үбшэндэ нэрбэгдэһэн газарнуудһаа үбшэнтэнэй ерэбэл, эмнэлгын эмхинүүдтэ оруулха, үбшэнтэн гэжэ һэжэглэбэл, тэдэниие дары түргэн эмнэлгын эмхинүүдтэ хаажа, харилсаһан хүнүүдыень баһал шалгаха ёһотой. Коронавирусна инфекцидэ нэрбэгдэһэн хүнүүдые яажа шалгахаб гэжэ эмшэд һуралсал гараа.
Короновирус үбшэнэй дэлгэрхэгүйн тула байгуулагдаһан уласай штаб суглануудые ходол үнгэргэнэ. Тэрэнэй бүридэлдэ Буряад Уласай Засагай газарай, хиналтын эмхинүүдэй, яамануудай, нютагай өөһэдын хүтэлбэриин түлөөлэгшэд оронхой. Буряад Уласай Роспотребнадзорой хүтэлбэриин дэргэдэ Оперативна штабай суглаан үдэр бүри эмхидхэгдэнэ.
- Эдэ хэмжээнүүдэй ашаг үрэ булта бидэнһээ дулдыдана. Өөрынгөө, дүтынгөө зонуудай энхэ тамирай түлөө һанаагаа зобобол, харююусалгатай ябабал, үбшэнһөө һэргылхэбди, - гэжэ Буряадай гүрэнэй ахамад санитарна врач, Буряад Уластахи Роспотребнадзорой хүтэлбриин дарга Сергей Ханхареев хэлэбэ.
Шэнэ үеын коронивирус (2019-nCoV) дэлхэйдэ тараһаар. Дэлхэйн 110 гүрэнүүдтэ 126 мянганһаа дээшэ хүн үбшэлэнхэй гэжэ бүридхэлдэ абтанхай.
Тиимэһээ коронавирусна үбшэндэ нэрбэгдэһэн гүрэнүүдээр уласай эрхэтэдтэ һэргылэмжын хэмжээндэ аяншалангүй байха хэрэгтэй.
Буряадай дэбисхэртэ үбшэнэй дэлгэрһэн гүрэнүүдһээ бусабал, Буряад Уласайэ элүүрын хамгаалгын яаманда 8 (3012) 37-95-32 гэһэн утаһаар хандаха шухала.
Тиихэдэ Буряадта бууһан газар, саг болон холбоо бариха арга тухай эмшэдтэ дуулгаха хэрэгтэй. Хүнүүдэй ханяаданай үбшэндэ нэрбэгдэбэл, эпидемидэ эсэргүүсэһэн хэмжээнүүд абтаха.
Коронавирусна инфекци гэжэ һэжэглэбэл, абтаха 5 дүрим:
1. Гэртээ байгты. Бэеынгээ муудабал, эмшэниие дуудаад, һүүлэй хоёр долоон хоногто хаана байһан, хэнтэй уулзаһан тухайгаа дуулгагты. Эмшэдэй заабаринуудые дүүрэн сахигты.
2.Элүүр хүнүүдтэй, илангаяа наһатай, хроническа үбшэтэй хүнүүдтэй бү харилсагты. Үбшэнтэнэй хойноһоо ганса хүнэй харабал, дээрэ.
3. Ханяаха, найтахадаа, ама хаажа, нэгэ хэрэглэгдэхэ аршуулаар аршаха. Тэрэнэй үгы байбал, тохоногтоо найтааха.
4. Бэеэ угааха, аршаха гансал өөрын хэрэгсэлнүүдтэй байха, нэгэ хэрэглэгдэхэ амһартаһаа эдеэлхэ.
5. Таһалга соогоо угаажа, аршажа, сонхо нээжэ байха хэрэгтэй.
